كلنا نسمع عن الماسونية وأغلب تصورنا عنها إنها جماعة سرية وفيه اللي بيقول كمان أنها غير حقيقية ومن وحي خيال عشاق نظرية المؤامرة .. لكن كتير ميعرفش أنها منظمة علنية وأنها كانت موجودة في مصر بشكل علني لعشرات السنين وان انضم ليها بشكل رسمي مش في السر رموز سياسية ودينية وفنية شهيرة زي الخديوي توفيق وسعد زغلول وجمال الدين الأفغاني وسيد قطب ويوسف وهبي وفريد شوقي وغيرهم!
فتعالوا مع بعض نستعرض تاريخ الماسونية في مصر وازاي الرموز دي انضمت للمنظمة دي عادي وازاي انتهت الماسونية في مصر بشكل رسمي.
بعد الحملة الفرنسية ما جات مصر سنة 1798 بدأت تظهر في مصر المحافل الماسونية الرمزية على ايد نابليون وكليبر وبعض قواد الحملة وظباطها الماسونيين خاصة ان فرنسا معروفة أنها معقل الماسونية وان الماسونية هي اللي كانت ورا الثورة الفرنسية الشهيرة لكن ده مش موضوعنا.
المهم إنهم في أغسطس من عام 1798 أقاموا محفل ماسوني باسم «محفل إيزيس» لكن المحفل ده وقف بعد رحيل بونابرت ومصرع كليبر ومغادرة الحملة الفرنسية كلها مصر.
انقطاع طويل حصل بعد كدة بين مصر والماسونية لحد ما اتكررت المحاولة من جديد في عام 1830 وده لما أسس بعض الإيطاليين في الإسكندرية محفل على الطريقة الاسكتلندية!
بعدها محفل تاني في القاهرة سنة 1838 تحت رعاية المجلس العالمي الممفيسي الفرنسي، اسمه محفل «مينيس»، وفي سنة 1845 شهدت الإسكندرية تأسيس محفل تحت رعاية محفل الشرق الأعظم الفرنسي اسمه محفل «الأهرام» وده انضمله كتير اوي من الأجانب والمصريين.
المحفل الأخير ده حسب كتاب ( تاريخ الماسونية في مصر) المنشور سنة 1889 كان ليه الفضل الأكبر في بث التعاليم الماسونية في مصر تحت سمع وبصر الحكومة المصرية وكان من أبرز أعضائه غير الأوروبيين عبد الحليم ابن محمد علي باشا الشهير باسم الأمير حليم ولي عهد الخديوي إسماعيل وقتها والأمير عبدالقادر الجزائري.
اتوسعت بعد كدة المحافل الماسونية في مصر وضمت ليها العديد من الشخصيات الشهيرة وأعضاء العيلة المالكة والنخبة الاجتماعية والطبقة السياسية والمثقفين والفنانين، ومن أبرز الشخصيات دي على سبيل المثال لا الحصر:
الخديو توفيق، جمال الدين الأفغاني والإمام محمد عبده و إدريس راغب باشا رئيس مجلس شورى النواب في عهد إسماعيل ومؤسس النادي الأهلي، وعدد من الزعماء السياسيين الكبار زي سعد زغلول وعبدالخالق ثروت وعدلي يكن وأحمد ماهر وفؤاد سراج الدين..
تم إنتخاب الخديوي توفيق الرئيس الأعظم للمحفل الأكبر الوطني المصري عام 1887، وشغله بعده ادريس بك راغب، رئيس الوزراء وقتها!
أسماء تخض بس أزاي ناس بالمكانة دي تنضم لمنظمة مشبوهة زي دي ؟
لأنها ببساطة مكانتش منظمة مشبوهة وقتها خالص.
الطقوس الماسونية دخلت مصر كنوع من مظاهر التغريب وتقليد الأوروبيين اللي انتشرت في المجتمع المصري وقتها.
الماسونية كانت بتصدر نفسها وقتها ك نشاط اجتماعي بيدعو لمساعدى الخير والأخاء ونبذ التفرقة والعنصرية وخلافه.. بعيد عن اي أهداف دينية أو سياسية.
كل دي مبادئ اتقبلها المجتمع المصري خاصة طبقة الأغنياء واعتبروها نوع من العمل العام التطوعي والوجاهة الاجتماعية ( زي نوادي الروتاري في الوقت الحالي).
عشان كدة انضمت عناصر من كل طبقات المجتمع للمحافل الماسونية، ومنها الفنانون من رواد المسرح زي سلامه حجازي ويوسف وهبي وغيرهم.
وبعدهم محمود المليجي وحسين رياض ومحسن سرحان وشكري سرحان وعبد السلام النابلسي، واعتبروها نوع من العمل العام التطوعي اللي بيعلي من قدر الفنان عند جمهوره 😁
ده حتى الكاتب سيد قطب وده المنظر الأكبر لجماعة الأخوان المسلمين في منتصف القرن العشرين، كان عضو في المحفل الماسوني بالقاهرة وليه مقالة منشورة بمجلة المحفل بعنوان “لماذا صرت ماسونيا”!
ظهرت كتب ومجلات بتروج وبتتكلم كويس عن الماسونية وأول كتاب عن الماسونية في القاهرة ظهر عام 1889، وهو كتاب «تاريخ الماسونية العام» لجورجي زيدان اللي أتكلمت عنه من شوية بعدها مؤلفات شاهين مكاريوس اللي وصلت لعشر كتب، كان أولها كتاب «الآداب الماسونية» في سنة 1895.
ومؤلفات إدريس راغب الخمسة اللي نشرها في مطبعة المقتطف اللي كان بيديرها مكاريوس.
ده غير عشرات الصحف والمجلات بين يومية وأسبوعية وشهرية مهتمة بالماسونية اهتمام عام زي «اللطائف» و«المقتطف» و«المقطم».
ده غير الصحف المتخصصة اللي اهتمت بالماسونية اهتمام خاص، وكان عددها سبع صحف، من أبرزها «المجلة الماسونية» و«الجريدة الماسونية» ومجلة «الإخاء».
ومن شهرة الماسونية في تلك المرحلة، اهتمام المسرح بيها.
فهنلاقي فرقة عزيز عيد الشهيرة أيامها بتقدم مسرحية باسم «الماسون» في أكتوبر عام 1907 على خشبة مسرح دار التمثيل العربي وعلى خشبة تياترو الشيخ سلامة حجازي
وفي يونيو 1953، نشرت مجلة “الفن” تحقيق خاص بنشاط المحفل الماسوني في القاهرة قالت في مقدّمته:
“لأوّل مرة في تاريخ الماسونية، تتسرّب الصحافة إلى القاعات السرية، وتشاهد بعض الطقوس الخاصة من تقاليد هذه الجمعية العريقة.
كان ذلك مساء الثلاثاء الماضي، وقد حفلت الدار الماسونية بجمهور كبير من الفنانين الماسون، نذكر منهم يوسف وهبي ومحسن سرحان وفريد شوقي وأحمد كامل مرسي ومحمود المليجي وفؤاد شفيق وعبد السلام النابلسي وحلمي رفلة وحسن رياض ومحمود فريد وعيسى أحمد وعلي رشدي وأحمد سعيد وغيرهم كثيرين”
طب أزاي انتهت الماسونية في مصر بشكل رسمي وعلني على الأقل ؟
رغم الشعار الماسوني المعروف والمعلن واللي بيحظر علي المحافل التدخل في أمور السياسة أو الدين إلا أنها ورطت نفسها بشكل واضح في أمور سياسية من أبرزها مناشدتها أهالي فلسطين الهدوء والسلام والعيش المشترك مع اليهود !
كلامهم ده تزامن مع الهجرات اليهودية المنظمة اللي كانت بدأت لفلسطين بعد وعد بلفور.
البيان ده صدر موقع من إدريس باشا راغب رئيس المحفل الوطني الأكبر في مصر بتاريخ 2 أبريل 1922 تحت عنوان «نداء إلى أهالي فلسطين».
فبعد ما بدأ الفلسطينيون حسوا بخطر المهاجرين اليهود وبدأت الاحتكاكات تحصل بينهم، أصدر المحفل الأكبر الوطني في القاهرة (المحفل الماسوني التابع لمحافل إنجلترا اللي كانت محتلة مصر وقتها ) برئاسة إدريس راغب نداء للفلسطينيين بالهدوء وقبول توطين اليهود فيما يُسمى بالوطن المشترك، باسم “الحرية والإخاء والمساواة” والكلام الفارغ بتاعهم ده.
بعد كدة حصلت أحداث تاريخية وسياسية كتير زي حرب 48 و23 يوليو سنة 52 ووصول الضباط الأحرار للسلطة فكان متاخد من الماسونية موقف بسبب ميولهم المعلنة لليهود وعدم انتمائهم لقضية الشعب الفلسطيني اللي كانت قضية كل مصري وقتها.
لحد ما جه يوم 18 أبريل ( يوم عيد ميلادي 😁 ) بس سنة 1964 لما أصدرت وزيرة الشئون الاجتماعية حكمت أبوزيد قرارها بحل الجمعيات والمحافل الماسونية في مصر ونشرته جريدة الأهرام تاني يوم .
وقالوا ان السبب هو عدم تقديمهم سجل بأهداف ونشاط المحفل، وبالتالي خروجهم من مظلة قانون الجمعيات الأهلية.
لكن جريدة الأهرام أكدت أن سبب وقف نشاط الماسونية، هو أن اجتماعاتهم كانت سرًا حتى على الدولة نفسها!
لحد التاريخ ده كدة الماسونية بقيت منظمة محظورة وغير رسمية لكن تفتكروا ان نشاطها في مصر انتهى تماما ؟
وهل يا ترى مفيش محافل ماسونية في مصر دلوقتي ؟
طب مين من المشاهير نجحوا في ضمه ليهم ؟
طب إيه أهدافهم الحقيقية اللي بيسعوا لتنفيذها ؟
وإيه اللي نجحوا في تحقيقه فعلاً؟
هسيب ده لتصوركم وتخيلكم.
معلش المقال طويل بس كالعادة اختصرته قدر الإمكان.
لو عجبكم وحسيته ان فيه معلومات جديدة وأول مرة تعرفوها وحابين غيركم يعرفها ياريت تعملوا شير للمقال.
التعليقات مغلقة.