اوعى تنخدع بالمظاهر ابدا
الصورة دي لمواطن مصري بيعتز بجذوره واصوله
مش من بتوع الجرين برجر
لكنه بيعرف انجليزي اكثر منهم
أصل الدكتوراه بتاعته اخدها من جامعة اكسفورد بانجلترا
وهو اول مصري ياخد دكتوراه في الحفريات الفقارية
كان ممكن يكمل عادي في انجلترا
لكنه فضل يرجع بلده
ويأسس مركز الحفريات الفقارية في جامعة المنصورة
ويعمل اول متحف للحفريات الفقارية
ويجيب تمويل عليه من مؤسسات كبيرة زي ناشيونال جيوجرافيك
عالمنا المحترم خلى مركز الحفريات الفقارية فسحة لاطفال المنصورة وخلاه حلم لشبابها
قدر انه يكتشف الهيكل العظمي لديناصور ضخم في مصر
وسماه علميا ” منصوراسورس” على اسم بلده المنصورة
قدر يكون فريق عمل محترم من باحثين سيدات ورجال في الحفريات الفقارية بيطلع بيهم رحلات استكشافية في صحراء مصر الواسعة
بيكتشفوا شكل الحياة في مصر والعالم من ملايين السنوات
وبينشروا ابحاثهم في اكبر دوريات علمية في العالم
وبيعرضوا اكتشافاتهم في مركز الحفريات الفقارية اللي دلوقتي مليان قطع نادرة عمرها ملايين السنوات لثعابين واسماك فقارية
كل يوم حلمه واسمه بيكبر
بقى واحد من اهم اساتذة وعلماء العالم في الحفريات الفقارية
https://www.researchgate.net/profile/Hesham-Sallam
رغم كده لا يبخل بعلمه على اهل بلده
ولا يستغنى عن هويته
المجد لبروفسور هشام سلام
المصري الاصيل المحترم
التعليقات مغلقة.