لما قلت إن ممكن مسلسل او عمل فني يخليك تغير نظرتك لأمر لو فرغته من الصورة الحلوة المقصود بروزته جواها هتلاقيه في الأصل فعل غلط ومشين ومرفوض. دليل بسيط ومن نفس المسلسل اللي اتكلمت عنه وقيسوا عليه يمكن تفهموا انا كنت أقصد إيه.
الصور دي متاخدة من مسلسل لعبة نيوتن لمنى ذكي الزوجة اللي سافرت أمريكا مع الشاب اللي يصغرها سنا وباتت معاه في اوضته من ورا زوجها واللي تسبب في خناقة كبيرة مع زوجها لما عرف فعلتها.
خروجات بقى مع الشاب ومواقف لطيفة يتحط عليها كابشن الصداقة افضل من الحب و4 ألاف واحد يشيروا ولافات وهييح واوعدنا يارب.
لكن تعالي فرغ الصور اللطيفة دي من محتواها وشوف الصور والعلاقة دي على حقيقتها وان دي زوجة متغربة بعيد عن بيتها وبتخرج مع شاب غريب عنها لوحدهم بدون إذن زوجها قابل ياعم.
يا رجعي يا متخلف يا قفل يا عدو المرأة يا معقد يا شكاك يا للي معندكش ثقة في حد وفيها إيه يعني وتبتدي تظهر تبريرات تقبل الخطأ تظهر عشان النفس تتعود وتستسيغ العلاقات اللي من النوع ده.
اصلها علاقة بريئة.
أصل الزوجة محترمة جداً ومش بتعمل حاجة غلط وعارفة حدودها.
أصل الشاب أصغر منها ياعم ومرتبط.
أصل زوجها شرير ويستحق.
وأصل وأصل واستحالة تلاقيهم يرفضوا الامر ده وأنه مخالف للشرع والعادات والتقاليد والثقة بين الزوجين وهيطلعوا العيب فيك وياخدوك بالصوت والسخرية والتقليل فيخلوك تشك في قيمك السوية ولإما تمشي في ركبهم وتعمل لاف وأنت ساكت لاما يقام عليك حد الرجعية والعداء لحرية المرأة.
كلامي ده للناس اللي قللت من تأثير المسلسلات ومفهمتش قصدي بنقطة السم في العسل لتشويه أفكار معينة وتخلي 4 آلاف واحد في بوست محدود زي ده يتقبلوا الفكرة دي ويتمنوها لنفسهم.
فتخيل أنت كام واحد اتغيرت أفكاره بالصورة دي ؟
أتمنى تكون فكرتي وصلت.
التعليقات مغلقة.