-هي الحائض كده ملهاش أي ثواب في العشر الأواخر ولا في ليلة القدر؟
=لأ طبعا ليها
-ازاي بقا! هي لا هتقدر تصلي القيام ولا هتعتكف
=ده حقيقي، بس مين قالك إنها مش هتاخد الثواب بإذن الله؟
-طب ازاي؟
=بص، إحنا دينا دين جميل، النبي عليه الصلاة والسلام قال “إذا مرض العبد أو سافر كتب له ما كان يعمل صحيحا مقيما”
-يعني ايه؟
=يعني لو واحد مثلا متعود يصلي في الصف الأول، بس جه يوم تعب أو سافر ومقدرش يلحق الصف الأول، بيتكتبله نفس الأجر كأنه صلى فيه
=طيب ايه علاقة ده بالحائض؟
=الحائض لو كانت متعودة إنها تعتكف أو تصلي التهجد وكانت ناوية على ده، بس الحيض هو اللي منعها، فهىي كده ليها نفس الأجر إن شاء الله
=بس الحائض مش مريضة!
=صح، بس هي مش هتقدر تعمل عبادة كانت ناوية تعملها بسبب هي لا تملك إنها تدفعه عن نفسها… دي حاجة غصب عنها
=طيب هي ينفع تعمل ايه تاني؟
=ينفع تقرأ القرءان
-ايه ده! ينفع تقرأ القرءان بجد؟
=آه والله ينفع
-وتمسك المصحف عادي؟
=لأ، تقرأ من الموبايل أو كتب التفسير
-طيب لو واحدة مبتعرفش تقرأ من الموبايل أو مش معاها موبايل؟
=تقرأ من المصحف عادي بس متلمسوش، تكون لابسة جوانتي وتقدر تقلب الصفحات بيه
-طيب تقدر تعمل ايه تاني؟
=تقدر تدعي وتستغفر وتذكر ربنا بكل أنواع الذكر زىي سبحان الله والحمد لله، الله اكبر، سبحان الله وبحمده سبحان الله العظيم… الخ
-طيب تقول ايه في ليلة القدر؟
=اللهم إنك عفو تحب العفو فاعف عني
كل سنة وانتوا طيبين. ربنا يبلغنا وإياكم ليلة القدر
التعليقات مغلقة.