✴تغيير الصمام الميترالي متى و كيف ؟
اتكلمنا في البوست اللي فات عن ارتجاع الصمام الميترالي، وفي البوست اللي قبله عن ضيق الصمام الميترالي، وبكدا نكون اتكلمنا عن أمراض الصمام الميترالي إجمالاً.
ودلوقتي حان الوقت إننا نتكلم عن تغيير الصمام الميترالي.
⚕️تغيير الصمام الميترالي هو الحل الوحيد لعلاج أمراض الصمام الميترالي في مراحلها المتأخرة واللي ممكن تتسبب في كتير من المضاعفات زي ما ذكرنا قبل كدا في مقالاتنا عن أمراض الصمام الميترالي على الموقع.
بس قبل ما تاخد أي خطوة نحو العملية فأنت محتاج تروح زيارة للطبيب عشان يقدر يحدد إذا كانت حالتك تستدعي تغييرالصمام من عدمه.
⚕️وهنا ييجي سؤال بيطرح نفسه، هو ازاي الدكتور بيقدر يحدد إذا كنت محتاج العملية؟
دا بيرجع لعدة فحوصات بيطلبها منك الدكتور زي: مخطط كهربية القلب، أشعة الإيكو (تخطيط صدى القلب)، والموجات فوق الصوتية وكمان فحوصات الدم، دا بالإضافة للفحص السريري وحدة الأعراض اللي عندك.
⚕️طب وإيه هي الطرق المتاحة ل تغيير الصمام الميترالي؟
استبدال الصمام الميترالي ممكن يتم بطريقتين:
💠الأولى: عن طريق عملية القلب المفتوح، ودي بيتم فيها شق الصدر وزرع الصمام الجديد.
عملية القلب المفتوح بتستدعي العديد من الإجراءات قبلها، وبعض المنهجية في الحياة بعدها وخلال فترة النقاهة،ودا كله تقدر تعرفه عن طريق مقالاتنا على الموقع.
💠الطريقة الثانية: علاج الصمام الميترالي بدون شق الصدر .
بدأ العديد من الناس تتوجه إلى طرق علاج صمامات القلب دون جراحةشق الصدر ودا لأنها بتكون أسهل وأخف وأسرع في فترة التعافي من عملية القلب المفتوح.
الطريقة دي بتتم باستخدام فتحة جانبية صغيرة (باستخدام المناظير)، وطبعاً دي بتكون أسهل من الأولى ومش محتاجين فيها نشق الصدر بالكامل.
وتقدر من خلال المقال دا تتعرف على طريقة تغيير الصمام الميترالي بالمنظار وكل ما يتعلق بها.
⚕️أما بالنسبة لإصلاح الصمام الميترالي، فدا برده ممكن يتم بطريقتين:
💠الأولى: رأب الصمام الميترالي، أو باللغة الدارجة ممكن نقول “ترقيع” والطريقة دي بتكون لعلاج ارتجاع أو ارتخاء الصمام الميترالي من حيث إننا بنقوم بإصلاح حلقة الصمام المسؤولة عن فتح وغلق الصمام وإعادة وصل شرفات الصمام بشكل سليم بالتالي إحكام غلق الصمام.
💠الثانية: وهي توسيع الصمام الميترالي بالبالون عن طرق القسطرة، وهنا الهدف بيكون علاج ضيق الصمام الميترالي عن طريق إننا بستعمل قسطرة قلبية وبنستغلها إننا نوسع الصمام الميترالي.
⚕️عملية تغيير الصمام الميترالي بتستغرق قرابة 3-4 ساعات، وبيكون في أثنائها المريض تحت تأثير التخدير الكلي.
وبعد انتهاء العملية بيوضع المريض تحت العناية المركزة في أول 24 ساعة، وبعدها بيظل في السمتشفى حوالي 3-4 أيام، وبعد كدا بيحتاج فترة نقاهة بعد العملية.
كتير من المرضى بيسألوا عن كيفية الحياة بعد تغيير صمام القلب، وعشان كدا احنا سهلنا عليك وعملنا لك خطة للنقاهة بعد العملية
⚕️عملية تغيير الصمام الميترالي قد ينتج عنها بعض المضاعفات زي: حدوث نزيف، أو تعرض الجرح للعدوى، تكون جلطات دموية، أو مواجهة صعوبة في التنفس، أو اضطراب في نظم القلب، خد بالك برده ان مضاعفات عملية تغيير صمام القلب تختلف وتتنوع من شخص لآخر، حسب حالته الصحية وعوامل تانية مختلفة.
⚕️تغييرالصمام الميترالي بيكون إما عن طريق استبداله بصمام صناعي (مصنوع من الكربون أو التيتانيوم)، أو صمام حيوي (مستخلص من أنسجة حيوية).
طبعاً الصمام الصناعي بيعيش مدى الحياة مقارنة بالصمام الحيوي واللي بيستمر لقرابة 10-15 سنة فقط، إلا إن استعمال الصمام الصناعي بيحتاج معاه في الغالب استخدام أدوية السيولة مدى الحياة.
طب هل نقدر نقول اي هي أفضل أنواع صمامات القلب؟
في الحقيقة كل واحد فيهم بيديك ميزة عن التاني، وإن كان مشكلة الصمام الحيوي هو إنه بعد فترة من الزمن بيحتاج علاج أو استبداله مرة أخرى زي ما ذكرنا، وممكن تتناقش في النقطة دي مع طبيبك قبل العملية لحد ما تستقر على نوع الصمام.
كدا احنا خلصنا سلسلتنا عن الصمام الميترالي، لكن لسه مكملين معاكم في مقالات أخرى فيما يخص التوعية والثقافة حول أمراض القلب.
التعليقات مغلقة.