جراحة القلب بالمنظار
معدش أمامك وسيلة غير الجراحة بعد ما استنفدت كل الطرق التانية؟
مضطر إليها لكن خايف منها ومن صعوبتها وتبعاتها؟
طب وإيه رأيك لما نتكلم عن الطرق التانية بعيداً عن عملية القلب المفتوح؟
دلوقتي خلينا ناخد لفة حول جراحات القلب طفيفة التوغل أو جراحة القلب بالمنظار.
الطريقة دي أخف من الطرق اللي فاتت الخاصة بعملية القلب المفتوح، واللي كنا بنشق فيها الصدر من المنتصف عند عظمة القص بجرح حوال
16-20 سم وبعدها بنوقف القلب ونوصل الدورة الدموية بماكينة القلب والرئة الصناعية ونشتغل العملية.
(اه بالمناسبة أنا جهزت لكم مقال عن ماكينة القلب الصناعي، قريباً جداً هتلاقيه نازل على الموقع)
..
أما فيما يخص أنواع الجراحات طفيفة التوغل:
1: عندنا أول نوع ممكن نشق فيه عظمة القص برده ونشتغل على الجزء المصاب من القلب، بس الفرق هنا عن عملية القلب المفتوح هو إن الجرح هنا بيكون أصغر، بيبلغ حوالي٦- ٨ سم فقط.
2: عندنا النوع الثاني هو جراحة القلب بالمنظار من خلال فتحة جانبية صغيرة،
وهنا بدل ما كنا بنشق الصدر زي الجراحات اللي فاتت، هنقطع جزء من العضلات ما بين ضلوع الصدر (جزء منها عند المنطقة اللي هنشتغل فيها)، وبعد ما العملية تنتهي نخيط العضلات والجرح وكله ببقى تمام.
3: في نوع تالت ألا وهو جراحة القلب الآلية
في النوع دا من الجراحة الجراح بيصنع الجراح 3 شقوق في أماكن مختلفة بين ضلوع الصدر من على الجانب ويبدأ من خلالها يدخل الأدوات ويشتغل.
اللي بيدخل الجسم هي الأذرع الآلية المتصلة بالأدوات الجراحية، وبيتحكم فيها الطبيب من الخارج.
دول كانوا الثلاث أنواع للجراحات طفيفة التوغل، واللي بتسمى أيضاً: جراحة القلب بالمنظار او الانسان الالي
هسيبك بقى مع مقال بتكلم بالتفصيل عن تقنيات إجراء جراحات القلب المفتوح ودواعي إجرائها
طب ليه أتجه إلى جراحة القلب بالمنظار أو الجراحات طفيفة التوغل في العموم؟ واي اللي يميزها عن عملية القلب المفتوح؟
جراحة القلب بالمنظار لها مميزات عن عملية القلب المفتوح، وأولها ان الجروح اللي بيصنعها الجراح عشان يشتغل أصغر من الجروح في عملية القلب المفتوح؛ وبالتالي هنستفيد حاجتين: أولاً الجرح لما يلتئم هيعطي شكل جمالي أفضل بكتير، وثانيا الجرح هيلتئم أسرع، واللي شق عظمة مش زي اللي شق عضلة.
كمان العملية هتكون أقل في الألم طبعاً، لأن مش هينفع نساوي ما بين جرح كبير وجرح صغير، وجرح شقينا فيه عظمة زي عظمة القص بجرح لم نشق فيه عظم خالص.
ضيف على كدا ان المريض هيتعافى بشكل أسرع، وتقدر تاخد جولة في الفيديو دا
بعد جراحة القلب بالمنظار أو الجراحات طفيفة التوغل المريض ممكن بعد مرور ٣ أسابيع يرجع لكتير من أنشطة حياته (لكن من غير ما يثقل على قلبه أو يضع عظام الصدر تحت مجهود) وفي خلال 5-8 أسابيع بيكون رجع لحياته بشكل طبيعي جداً.
ضيف على كدا ان فرصة الإصابة بالعدوى أو النزيف بتكون أقل وبالتالي احتياجه لنقل الدم هيكون أقل.
طيب هل جراحة القلب بالمنظار والجراحات طفيفة التوغل تنفع لكل أمراض القلب؟
النوع اللي معانا من الجراحات بينفع لكتير من أمراض القلب، لكن قبل ما نتكلم عن الأمراض
خلونا نعرف هل كل الناس تناسبهم العملية دي؟
تحديد ملائمة العملية للمريض دا أمر صعب تحديده بشكل عام، والأمر دا يرجع لرأي الطبيب المعالج وتقييمه للحالة الصحية العامة والمرض المصاب به المريض ودرجة تقدمه وعوامل الخطورة وخلافه من معايير إجراء الجراحة.
ولو هنتكلم عن الأمراض اللي ممكن نستخدم فيها التقنيات دي فهي:
ارتجاع الصمام الأورطي
ضيق الصمام الأورطي
ارتجاع الصمام الميترالي
ضيق الصمام الميترالي
إصلاح أو استبدال الصمام ثلاثي الشرفات
ثقب الحاجز الأذيني،
واللي اتكلمنا عنه قبل كدا .
ترقيع الشرايين التاجية
استئصال أورام القلب
وغيرها من أمراض القلب وزراعة الأجهزة فيه وخلافه.
خد بالك برده اننا بعد العملية محتاجين ننتظم على أسلوب حياة صحي وسليم، فلو أنت مدخن وقف تدخين، لو الكوليسترول نسبته في دمك مرتفعة هتحتاج تروح للطبيب عشان تظبط النسبة، لو مصاب بضغط أو سكر لازم تستمر على العلاج، كمان حاول تحافظ على وزن مثالي وتمارس رياضة بانتظام حتى لو هتبقى مجرد مسافة بتمشيها يومياً.
الحمية الصحية و الغذاء المتوازن لصحة القلب والجسم
دا كان خلاصة حديثنا عن جراحة القلب بالمنظار والجراحات طفيفة التوغل
دمتم سالمين
التعليقات مغلقة.