بلا كشف بلا تحليل بلا صندوق بلا كلام فاضي .
تاخد بعضك وتحجز لعروستك وأبوها تذاكر طيران للسعودية ترانزيت دبي .
التذاكر علي ويز اير وفلاي دبي وبعدها طيران ناس
حوالي 900 دولار رايح جاي ليكم كلكم (25 الف جنيه ).
احجز تذكرتين منفصلتين علشان رخامة المطارات .
تنزل جدة، تركبوا تاكسي يطلعكم علي مكة،
تنزلوا الفندق ، تحجز اوضين في فندق تلات ليالي ( بمجموع حوالي 600 ريال أو 4000 جنيه )
تسيبوا الشنط وتنزلوا تعملوا عمره .
بعد ما تخلصوا تاخدوا بعضكم وتطلعوا علي ماذون الأنكحة في الحرم ، الشيخ الدوسري هتلاقيه عند باب الملك فهد ، شيخ محترم ووجهه بشوش ، هيحببك في الزواج والخلفه أكتر مما تتخيل ، وأبقي سلملي عليه .
المهم ، تكتبوا الكتاب في بيت ربنا ، في الحرم نفسه ، وتاخدوا عقد الجواز ، وتاني يوم تطلع بيه علي السفاره .
توثقه بما يعادل 5 الاف جنيه .
تاخد عقدك ، ترجع مصر ، تروح شقتك وربنا يتمملكم علي خير .
كده ليلتك كلها تقفل 35 الف جنيه .
وعملت عمره انت وعروستك وابوها ، ووفرت علي نفسك مصاريف فرح وصناديق وكشوفات ورسوم وصناديق وبطيخ .
زادت شوية، قلت شويه ، انت المستفيد والكسبان .
…
ومتنساش تفرحنا بصوركم .
مبروك مقدما .
عمر احمد
التعليقات مغلقة.