لما الطفل يكون عنده تبول ليلي لا إرادي نروح بيه تخصص إيه ؟!
ده سؤال لازم الناس كلها تعرف إجابته علشان ميدخلوش في دوامة ملهاش لازمة
والإجابة الوحيدة الصحيحة هي :
نروح لدكتور الأطفال ويا إما العلاج يكون عنده يا إما يبعته للتخصص المناسب لحالته حسب ما يتم تصنيفه لأن الموضوع مش موحد خالص زي ما الناس فاكرة … واقرأ الكلمتين دول معايا :
1- في أطفال بيتولدوا بخلل في الهرمون المتحكم في عملية إدرار البول ADH (وده معروف بمرض السكر الكاذب) سواء في جهة صدوره من الغدة النخامية في المخ أو في جهة عمله وهي الكليتين … دول هيحتاجوا تخصص غدد أو أمراض كلى
2- في أطفال بيتولدوا بمشكلة في الأعصاب الخارجة من العمود الفقري المتحكمة في عضلات التبول … ودول هيحتاجوا تخصص جراحة مخ وأعصاب
3- في أطفال عندها إمساك وده بيخلي القولون يضغط على المثانة ويسبب خلل في التحكم في البول … ودول ممكن يحتاجوا تخصص جهاز هضمي اللي هو حاجة غير الباطنة بالمناسبة
4- في بنات عندها سقوط في الرحم وده بيضغط على المثانة برضه … ودول هيحتاجوا تخصص جراحة نسا
5- في أطفال عندهم مشاكل تنفسية زي حساسية الأنف واللحمية … ودول ممكن نحتاج لتخصص جراحة الأنف والأذن
6- في أطفال عندهم مشاكل مزمنة في البول نفسه ومش هنخسر حاجة لو عملنا لكل الأطفال تحليل بول بشكل دوري … ودول غالبا هيكملوا متابعة مع تخصص الأطفال
7- في طفال بتحصل لها خبطات في اللعب والمدارس واللي ممكن الطفل ميعرفش يحكي عنها … ودول ممكن يحتاجوا تخصص جراحة أطفال
8- في أطفال عندها مشاكل نفسية زي الخناقات المنزلية وسماع أفلام الرعب والغيرة بسبب قدوم أخ جديد والتنمر والمشاكل من النوع ده تشكل 90% من أسباب التبول الليلي اللا إرادي عند الأطفال … ودول هيحتاجوا تخصص نفسية وعصبية وهو تخصص مختلف عن تخصص جراحة المخ والأعصاب
9- في أطفال عندها مشاكل خلقية في العضو نفسه وده محتاج لتخصص جراحة مسالك بولية
10- ممكن المشكلة تكون في الوزن الزائد اللي بيمثل ضغط كبير على المثانة فهنحتاج لتخصص علاج سمنة ننزل بالوزن ده
عرفتوا بأه إن الموضوع مش بالبساطة اللي كتير من الناس بيتخيلوها ؟!
الموضوع محسوم لدرجة إني أقول بناء على حالات كتير شفتها :
أي بداية في الموضوع ده مش من عند دكتور الأطفال هيا دخول في المتاهة لن تحل به المشكلة حتى نعود لنقطة البداية الصحيحة !! والله اعلم
التعليقات مغلقة.