تعرف الفنان «محرم فؤاد» ؟
أيوة «محرم فؤاد» الهادئ اللطيف ده العادي جدا في وسامته واللي فنه كان بيصنف انه فن شعبي بمقاييس عصره
طاب تعرف ان الواد السُهن السُفيف ده إتجوز «تحية كاريوكا» في عز جمالها و نجوميتها ؟
ومش بس كده ، دا بعدها إتجوز ملكة جمال لبنان «ماجدة بيضون» (هي اسمها كده والله ، انا ماليش دعوة )
طاب خلاص خرجنا من المحلية ووصلنا للإقليمية.. نحمد ربنا بقا ونقول بارك الله فيما رزق ؟
مطلقا
بعد «ماجدة بيضون» راح اتجوز أيقونة النعومة والجمال الرومانسي الحالم «ميرفت آمين» في عز نجوميتها
يسكت على كده ويحمد ربنا على نعمه و رزقه الواسع ؟
أبدا
بعد «ميرفت آمين» راح اتجوز أيقونة الأنوثة المتفجرة وفتاة أحلام كل شباب الوطن العربي في الخمسينات والستينات ؛ المطربة والفنانة «صبـااااح» أيوة .. «صبـــاح» …بجلالة قدرها .. تخيل يا مواطن !!
طاب نهمد بقى ونقول دا احنا خلاص وصلنا لليفل الوحش ؟
كلا البتة
بعد فترة طلق «صباح» واتجوز «سهير رمزي» .. أيوه «سهير رمزي» …اللي هي جمل يا ابا الحاج جمل
يتهد بقا ويسيب فرصة للشباب الواعد ؟
لا ممكن أبدا
زي ما عمل مع اللي فاتوا عمل مع «سهير» وطلقها ..
ماهو اللي يسيب «ميرفت آمين» و «صباح» وملكة جمال الكون مش هيبقى على حاجة بعد كده
وبعد «سهير» اتعرف على واحدة لبنانية اسمها «جورجينا رزق» ودي كانت فازت بلقب ملكة جمال الكون سنة 1971
يعني الجاحد ساب «صباح» وقبلها «ميرفت آمين» و راح اتجوز «جورجينا».. ما هي مش ملكة جمال لبنان بس ، دي ملكة جمال الكون يا ناس
يتهد و يقول خلاص كده انا أخدت كاس العالم في المزز ؟
برضو لأ
راح ساب ملكة جمال الكون ، وتقريبا كده كانت نفسه موعت من كتر المهلبية اللي بالقشطة اللي بقاله سنين عايم وبيلهط فيها ، فراح اتجوز نجمة مصر في الرقص الشعبي في الوقت ده
«عايدة رياض».. أصل الواحد برضو بيحتاج حاجة حرشة بعد الحلو ده كله ، بس دي ما طولش معاها و سابها لاتهامها في قضية آداب وساب سكة الراقصات والممثلات واتجوز مذيعة اسمها «منى هلال»
.
أنت بقى يا عم الشباب فين انجازاتك في هذه الحياة الدنيا ؟
دا انت مرتبط بواحدة شبه ابن خالتك و محسساك انها الأميرة ديانا
أو متجوز عمك عبدالرازق ومفهماك انها غادة عبد الرازق
وكمان بتتنك عليك وتقولك انا زي الفريك محبش شريك
لا وفرحان بنفسك ومسمي نفسك عنتيل مصر
يا بااااائس
التعليقات مغلقة.