السبب الاساسي انك لما بتوقف دايت او تمرين او اي عادة جديدة بتوقفها تماما وبتتعب جدا عشان ترجع تاني، هو انك لما بتبدأ بيبقي واخدك الحماس، فبتبدأ جامد اوي ومرة واحدة وممكن تعمل حاجات مش مطلوبة منك اصلا.
يعني مثلا دكتور يقولك تصوم ١٦ ساعة، تقوم انت مقرر تصوم ٢٠، عشان الارادة والعزيمة وعشان احنا بنكون متخيلين اننا لو ضغطنا علي نفسنا اكتر هانتكرم وهانوصل لنتيجة اسرع.
او ان الكابتن يقولك اتمرن ٤٠ دقيقة، تقوم متمرن ٣ ساعات.
ده بيحصل لكذا سبب:
١- انك بادء العادة الجديدة دي معتمد علي الارادة والحماس، ودي حيطة مايلة.
هي شوية وهاتروح، شوية العزيمة والارادة شوية وهايروحوا وانت عارف انهم هايروحوا فبتحاول تستغلهم علي قد ما تقدر وتجيب اقصي ما عندك.
بس للاسف ده بعد كده بيجيب نتيجة عكسية وبيخليك تبطل خالص، خصوصا انك هاتلاقي ان مش شرط اني كل ما جيت علي نفسي اكتر، كل ما خسيت او شوفت نتيجة اسرع.
٢- محاولة للسيطرة علي النتيجة، اللي هي اصلا مش في ايدك.
انت في ايدك تتعب وتعمل اللي عليك، مش في ايدك النتيجة، وده في كل جوانب الحياة مش بس في الدايت.
طب لو انا عايز احس اني مسيطر علي حاجة انا مليش سيطرة عليها، اعمل ايه؟ اجيب اخري.
علي الاقل هاحس ان في حاجة في ايدي اتحكم في النتيجة بيها.
٣- الاعتقاد الخاطئ ان ده هايحسن او يسرع النتايج.
دي مقولة ل Tim Ferris
رجل اعمال وكاتب ومحاور كبير، بينصح نصيحة عكس اللي معظم الناس بتنصحها، وخصوصا في الرياضة والتنمية البشرية
بيقول دايما اعمل اقل شوية من اقصي حاجة عندك، عشان ماتجيبش اخرك وتعرف تكمل
always do less than you can handle.
التعليقات مغلقة.