انها دولة الواتساب يا سادة

دولة كل ملفاتها على الواتساب
كل تواصل مسؤوليها على الواتساب
كل صورها ومكالماتها السرية هلى الواتساب

شن مزال تبو فيهم شركات الاتصالات..
والاكثر كارثية ان داير واتساب برقم تركي او اوروبي او مصري او تونسي.. ويقولك انا واثق في الواتساب ولا اثق في الايميل

تي ليش يا راجل يا معاليك يا فخامتك.. يقولك ما هو ايميلي الفيسبوك ممكن يخترقوه🥴🥴🥴

لا يا سعادتك.. الايميل هو ذالك النص المقسوم @ او حرف a عليه دائرة
موثوقيته وقوته اقوى من الواتساب والفايبر والتيليقرام

انها دولة الواتساب من ستة سنوات ماضية وحتى اليوم..

ما تقولي امن دولة ولا تقولي امن المعلومات ولا مخابرات ولا سيادة.. كل مسؤول ومدير ادارة فيهم داير منصة تواصل رسمي هي الايميل او الورق الرسمي لا غير..الواتساب دايره chats دايره هدرزة فقط لا غير

اما قرارات مصيرية على واتساب عيب وعار وضياع..

واللي يقدر يقول عكس هكي يتفضل..
اذا كانت التسريبات الامريكية كلها تسريبات ايميلات وما شفت مسؤول في العالم معتمد على شركة Meta اللي هي فيسبوك سابقا، في التواصل السري الامن الا جماعتنا.

كان تبوها بالقانون في لائحة معتمدة من الحكومة باعتماد email في التواصل رقمها 563 لعام 2021
وكان تبوها بامن المعلومات في سياسة صادرة من هيئة امن وسلامة المعلومات بكيفية الحفاظ على السرية والاستخدام الامن رقم 44 لعام 2021

وعاش الواتساب كاسر انوف الايميلات في ليبيا

‎#السياسة العامة للبريد الالكتروني للمؤسسات_الليبية

libya_email_policy

‎#القرار563لعام_2021