في اكلات كتير ممكن تكون عارف انها مفيدة بس مابتحبش طعمها، ممكن تفكر تغرقها كاتشب مثلا عشان تعرف تاكلها او تجيب دريسنج وصوص السلطات عشان تعرف تاكل خضار.
دي طريقة غلط خالص عشان تاكل اكل صحي وبتضيع معظم الفايدة، بانك تغرق البروتين سكر (كاتشب) او تغرق السلطة دريسنج (زيت ودقيق وسكر).
طب اعمل ايه لو مش بحب طعم الاكل الصحي؟
١- الاكل الصحي طعمه حلو، بس عمره ما هايكون زي الاكلات السريعة اللي هي مش اكل اصلا.
اول خطوة عشان تستعطم الاكل الطبيعي هو انك تقطع الاكلات السريعة، تقطع مش تقلل.
طول ما انت متعود علي طعم الاكل اللي غرقان صوص واللي مقلي في الزيت، طبعا طعم الاكل الطبيعي مش هايعجبك.
بعد فترة من قطع الاكلات السريعة والمصنعة والمقليات، هاتبتدي تستطعم الاكل الصحي وتشتهيه كمان.
٢- لو في حاجة معينة مش حابب طعمها بدلها بحاجة تانية تكون قابلها اكتر.
يعني نوع خضار بخضار او بروتين ببروتين.
او جرب تعملها بوصفة صحية، انا مثلا في ناس كتير بعتتلي انهم ماعرفش ياكلوا افوكادو غير لما جربوا وصفة موس الافوكادو في كتابي للوصفات.
٣- اعرف ان فكرة الطعم والتذوق متغيرة.
واللي مش حابب طعمه دلوقتي ممكن جدا تقبله مع الوقت والتكرار.
التعليقات مغلقة.