ثكـلـ.ـتك امك .. يعني فقدتك ..
دعوة صريحة مباشرة .. يارب تـ.ـموت ..
.
لكن لما سيدنا النبي محمد -صلى الله عليه وآله – قالها لسيدنا معاذ بن جبل .. كان بيقولها على سبيل الزجر .. مش على سبيل الدعاء .. حتي ان سيدنا معاذ توفى بعد سيدنا النبي بـ 7 سنين بحالهم .. وكانت حياته مليئة بالبركة ولقب حتى بإمام الفقهاء .. النبي نفسه قال عنه اعلم الامة بالحلال والحرام .. .
استخدامها على النحو دا كان مشهور عند العرب .. فمتتحسبش دعوة .. ومعناها يقاس بالعرف ..
ومفيش عالم في تاريخ الاسلام شرح حديث ( ثكـ.ـلـ.تك امك يا معاذ ) علي انه دعاء بالموت !!
.
وهنا بقى بتظهر بوضوح قاعدة تجبرنا على اعتبار الاعراف في الحكم على الألفاظ ..
كلام زي يالهوي ويخربيتك و تقبرني وغيرهم .. كلمات مش مقصود بيها المعني الأصلي .. والعبرة هنا بالقصد زى كلام النبي بالظبط ..
حتى كلمة ( والنبي ) عادة بيكون المقصود بيها ( علشان خاطر النبي ) مش المقصود بيها انه يحلف .. ولو يقصد انه يحلف فعندنا مذهبين في المسألة اختصرهم الامام بن تيمية في انه مكروه اما كراهة تنزيه او كراهة تحريم ..
.
.
فهنا احنا محتاجين نفرمل شوية في الحكم على كلامنا مع بعض ..
التنطع وصل في الامر لدرجة انك عادي جدا تشوف واحد كاتب ( مشاء الله ) لانه ضعيف املائيا او زى حالاتي بيكتب البوستات عادة بالصوت وبعدين يعملها ايديت .. وتلاقي حد تاني يقوله عدلها لانها شرك بالله !!
.
او مثلا بكتب المقال بالعامية فأقول يا بني ادمين .. حد يقوللي لا يجوز شرعا كتابة ( بنى ادمين ) لانه كان ادم واحد واللى بقوله دا دعم واضح لنظرية التطور وتكذيب لصحيح القرآن !! دا مش مجرد مثال .. دا حصل فعلا !!
دا واحد من كوكب تاني .. مش هنقول مبيراعيش اعراف اهل اللغة .. دا عايز يطبق قواعد الفصحى على العامية اللى بتكلم بيها .. خايف اقول (عايز الطم) حد يقوللي دى من افعال الجاهلية وكأني هلطم فعلا !!
.
نفرمل يا شباب الله يهدينا واياكم ..
التعليقات مغلقة.