موضوع سمك النيل اللي مليان دود دا غريب شوية .. انا مش متخصص فمعرفش انواع الديدان المنتشرة فيه .. غير اني بصطاد عادة في البحر وبلاقي احيانا قمل في السمك اللي بصطاده ..
.
قمل السمك دا كائن طفيلي بياكل لسان السمكة ويقعد مكانه .. وفيه طفيلي شبه بيعيش في الخياشيم .. وغيره بيعيش في البطن ..
.
معروف في اسكندرية ان الحاجات دي مش مضرة .. ارميها وكل السمكة عادي بعد طهيها .. لكن انا بقرف منها فبرميها المية تاني لو هتعيش .. ولو بالعة السنار او بقها اتقطع بسببه بديها لاي حد جنبي بلطافة كدا من غير ما ابينله اني قرفان منها فبديهاله ..
.
المشكلة بقى ان المراعي الطبيعية في مصر مضروبة بالنار .. النيل خربان .. البحيرات كتير منها باظ بسبب الصرف .. حتي البحر .. تقريبا كل المدن الساحلية بترمى الصرف علي البحر ..
.
وفوق دا كله مفيش رقابة على الصيادين .. بتلاقى الصياد بيصطاد بغزيلة رفيعة وبيطلع سمك بحجم البساريا ويبيعه عادي .. انزل السوق هتلاقي شراغيش قد نص كف ايدك ..
خنيني مبطرخ قد عقلتين الصباع ( نوع بلطي بيعيش في المية الخليط مالح مع عذب ) .. تبص للسمكة زى الصورة كدا بيبقى هاين عليك تقولها مين الحـ.ـيـ.ـوان اللي عمل فيكي كدا ..
والاسكندرانية في الخنيني المبطرخ معندهمش ياما ارحميني !!
.
فمبيدوش فرصة اصلا للسمك انه يكبر ويتكاثر .. وبيكنسوا البحر حرفيا عن طريقة مجموعة مراكب واصلة شبك رفيع جدا بينها .. بيقضوا على كل مظاهر الحياة البحرية بدون مبالغة ..
.
والنتيجة ايه ؟!
بلد عندها 2450 كم سواحل بحرية و نهر وعشرتاشر بحيرة عذبة ومالحة .. واسعار السمك عندنا بلح و بنلجأ لسد العجز بالاستزراع السمكي !!
التعليقات مغلقة.