عايز تاكل أكلة سمك فى الإسكندرية؟!
إطلع على المكس عند الكوبرى اللى بتعدى من تحته المراكب قرب الفنار القديم كده .. فيه صيادين هناك،
زى المشهد اللى فى بداية فيلم إسماعيل يس فى الأسطول وهو واقف قدام طوالى السمك بيصنفهم .. هتقف وتشترى منهم السمك اللى تحبه، وفى أى فرن جنبهم هتشوى وتقلى وتعمل شوربة جمبرى زى ما أنت عايز … وهتاكل سمك طازة لسه طالع من البحر وكمان هتدفع ثلث اللى بتدفعه فى مطاعم الأسماك الشهيرة
فيه صياد هناك أخدنا رحلة بالزودياك بتاعه دخلنا منطقة المكس بين بيوت الصيادين (فينيسا الغلابة) وعدينا على القلعة المهجورة وجزيرة الطيور اللى فيها كمية وأنواع طيور ماتخطرش على بالك، وعقبال ما خلصنا الرحلة بالزودياك كان الفرن خلص عمايل السمك وأخدناها وقعدنا ناكل فى المركب بتاعه وفى الآخر إديناه الزرق اللى ربنا بعتهوله علاوة على حق السمك
التعليقات مغلقة.