هو قيام الليل بيتصلى ازاي!!
قيام الليل بيتصلى زي صلاة الفجر كده ركعتين وتقول التشهد وتسلم
طب عدد ركعاته كام؟ بتوصل ل١٣ ركعة
بتبقى ركعتين ركعتين، ركعتين، ركعتين، ركعتين، ركعتين، ركعة واحدة ودي بتبقى اسمها الوتر
طب انا ينفع اصلي ركعتين بس أو اربعة أو حتي ركعة واحده بس اللي هي الوتر!! ايوه طبعًا ينفع
طب هو بيبدأ وقته من امتى!! من بعد العشاء لحد قبل الفجر واللي هو الثلث الاخير من الليل وده الوقت المستحب عشان ربنا سبْحانه وتعالى يتنزل إلى السماء الدنيا فى الثلث الاخير.. وينادى: (هل من سائل يُعطى؟ هل من داعٍ يُستجاب له؟ هل من مستغفر يُغفر له؟ حتّى يطلع الفجر) يعنى دعوتك الصادقة فى الوقت ده.. مُستجابة بأمر الله
-ينفع تصلي ركعتين بس أو اربعة
-ينفع تتصلى فردًا لوحدك أو في جماعة، يعنى زوجتك وأختك وأخوك ممكن يكونوا معاك
هو قيام الليل صلاة بس!!
-لا، القيام مش صلاة بس، بس خلينا الأول نتكلم عن الصلاة بتكون ازاي؟
اولاً: الصلاة بتكون تصلي مثني مثني، يعني ركعتين وتسلم وهكذا، بنقرأ فيهم الفاتحة وما تيسر لك من القرآن
- القيام مش بيُحسب بعدد الركعات إنما بعدد الآيات، ويكونوا بعشر آيات أو بميت آية أو بألف آية أو أي عدد عمومًا، في حديث بيقول
“من قام الليل بعشر آيات لم يكتب من الغافلين ومن قام الليل بمآئة آيه كتب من القانتين ومن قام الليل بألف آيه كتب من المقنطرين”
يعني هنا القيام بيُحسب بعدد الآيات وليس بعدد الركعات، كده خلصنا الصلاة
ممكن حد ميكونش عاوز يصلي ممكن يقرأ قرآن، ممكن يسبح ويستغفر، الذكر عمومًا، فهي بتكون درجات
الصلاة لأنها تشمل قرآن وذكر، وبعديها القرآن، وبعديها الذكر
الشيخ محمد حسين يعقوب بيقول:
القيام! مستحيل ربنا يرزق القيام لمسلم غير لما يكون بيحبه
ربنا بينزلك للسماء الدنيا عشان بس يسمعك، يغفرلك، يعطيك، يرزقك، بيبقي مستني منك يسمع كلمة يا رب عشان يقولك لبيك يا عبدي
بيسمعك رغم لغبطتك، بكائك، ذنوبك
كل ما أقرأ آية “وَالَّذِينَ يَبِيتُونَ لِرَبِّهِمْ سُجَّدًا وَقِيَامًا”
ابتسم واقول يعني اللي بيصلي القيام من عباد الرحمن يا رب ؟ اللي هما اعلي منزله يوم القيامة!
أجمل وأطهر ربع ولا نص ساعة، هو “سبحانه” مش بيقولنا تعالوا صلوا عشان عاوزكم لا ده بيقولنا تعالوا اشوف انتوا عاوزين إيه؟ نفسكم في إيه؟ محتاجين إيه؟
التعليقات مغلقة.