.
بعد تجربة محلات سمك في القاهرة وبنها بيشتغلوا في السمك البحري .. خليني اقولك معظمهم بيعمل الآتي :-
.
1- بيبيع جمبري المزارع علي انه بلدي .. و واحد منهم كان عايز يبيعلي جمبري مجمد علي انه ازاز (( الازاز افضل انواع الجمبري في مصر )) ..
2- الفيليهات كلها من سمكة الباسا. لو متربية في مصر ماشي هنقول سمكة مش حلوة اوي .. لكن اللي مستوردة من برا بتتربي في مصارف !
3- فيليهات الهامور و القاروص كلها فيليهات لوت .. سمكة اللوت سمكة جميلة جدا وبتشتغل معاك في اي حاجة .. صواني مقلي مشوي سنجاري .. لكن سعرها 60% من الهامور والقاروص ..
4- فيليهات القراض مالية اسكندرية .. مصادفتش فيليه قراض في القاهرة او بنها بصراحة لكن اللي بيتغش بيه الاسكندرانية اكيد بيتغش بيهم غيرهم
.
5- البربون معظمهم بيستخدموا بربون سنغالي على انه بلدي .. واللي بيقدم بلدي بجد بيجيب عنبر ودا اقل انواع البربون في مصر جودة وسعر.
6- حتي الماكريل المستورد .. بيستخدموا بداله سمكه شبهه لكن ارخص اسمها شاخورة ..
7- البوري بيستخدموا اقل انواعه واللي بنص سعره .. سمكة الطوبار.
8- بيبيعوا تونة حرة بسعر احيانا بيتجاوز 100 جنيه .. في حين انهم بيستخدموا سمكة الكبريت ودي سعر الكيلو 20-25 ..
.
.
انا مبحبش السمك اوي .. بس بصطاد هاربون وكاستينج وتسقيط فبفهم في انواع السمك كويس .. وكل اللي قولته دا كوم والغش اللي بيحصل في اسكندرية للمصيفين كوم تاني .. خاصة اللي بيلفوا بالسمك علي البحر ويبيعوا سمك سلفر الكيلو ب 10 جنيه علي انه قاروص الكيلو ب 160 ..
التعليقات مغلقة.