ايه الافضل ليك .. انترنت وي ولا ستارلينك ؟

.
متتسرعش في الاجابة .. خلينا نشوف الدنيا مع بعض ..
.
1- تكلفة المعدات
معدات الانترنت الكحيان بتاعنا تكلفتها 400 جنيه (اقل من 5% من ستارلينك) + خط ارضي تكلفته 180 جنيه.
معدات ستارلينك ب500 دولار ( 8000 جنيه ) و دا من غير الجمارك والضرايب اللي هتندفع عليها بالاضافة للتصاريح.

.
2- السرعة
انترنت وي بيختلف علي حسب المكان .. السرعة عندي في البيت 70 ميجا بت/ الثانية وممكن تزيد .. في معظم الاماكن في مصر اخرك 30 ميجا وبعض الاماكن لسة فيها خطوط قديمة فبتنزل لحد 8 ميجا.
ستارلينك سرعته بتوصل لـ 150 ميجابت/ثانية والحد الادني ليها 50 ميجا.
.
3- الباندويدث
انترنت وي محدود .. باقتي مثلا 250 جيجا داونلود واحيانا بحتاج اجددها بدري عن معادها او اشتري سعة اضافية.
ستارلينك مفتوح.
.
4- خدمة العملاء
مفيش اتنين بيختلفوا علي ضعف خدمة عملاء سوق الاتصالات عموما في مصر .. وان كنت ملاحظ ان الدنيا اتحسنت شوية في الفترة الاخيرة
ستارلينك نفس الكلام .. الفيد باك علي ريديت ملخصه ان خدمة العملاء كويسة جدا لحد ما تشترك وبعد كدا الموضوع بيبقي صعب.
.
5- تكلفة الخدمة
الباقة بتاعتي (250 ميجا داونلود + سرعة 70 ميجا) بدفعلها 370 جنيه اظن شاملة الضريبة ..
باقة ستارلينك ( داونلود غير محدود + سرعة متوسطها 100 ميجا ) تكلفتها بدون ضرايب 1600 جنيه..
.
.
الملخص
ستارلينك مش سحر ..
لكن ممكن يكون مناسب ليك في الحالات الاتية :-
1- النت عندك ميت وعايز سرعة عالية مش متاحة بالارضي.
2- بتدور علي خصوصية اكبر.
3- لو هتعمل وان او لان وتوزع الانترنت علي اكتر من مستخدم لتقسيم التكلفة. ودا في حال ان السرعة النهائية لكل مستخدم هيندفعلها اقل من اللي هيندفع للشركة المصرية.
4- لو انت في صحراء.
5- بتحمل ملفات باحجام وكميات كبيرة جدا.
.
وبالمناسبة .. الانترنت من خلال الاقمار الصناعية موجود في مصر من سنين طويلة وشغالين في النور .. خطط اسعار ستارلينك الحالية مبتمثلش خطر علي الشركات المحلية وقطاع الاتصالات وان كانت جيدة نسبيا بالنسبة للشركات التانية زي ViaSat و HughesNet ..
.
اي كلام عن حظر ستارلينك مش حقيقي .. ولو حصل تضييق من الحكومة عليهم في المستقبل القريب اعرف انها مجرد ورقة ضغط طلعتها الحكومة خلال المفاوضات مع ستارلينك و المتعلقة بالضرايب والتراخيص والرسوم ..

ملحوظة : السرعات بتتحسب بالبت مش بالبايت ..
علشان كدا مثلا عندي السرعة 70 ميجابت في الثانية ..
لو حاولت احمل ملف 10 جيجا مثلا هياخد مني حوالي 20 دقيقة لان الملف هينزل بسرعة 8.75 ميجا ((بايت )) في الثانية ..
.
البايت = 8 بت .. وسرعة الابلود بتكون نص الداونلود ..