هو انا كمواطن مصري ممكن اتأثر ازاي من الغزو الروسي لاوكرانيا….
خلينا نقسم الموضوع لايجابيات وسلبيات وبما اننا دايما بنحب التشائم فخلينا نبدأ بالاضرار واللي اهمها طبعا طبعا موضوع العيش والقمح لان مصر بتستورد كميات كبيرة من القمح من أوكرانيا وبسبب الحرب دي اكيد طبعا الأسعار هتزيد وطبعا لولا الصوامع اللي مصر عملتها خلال الفترة اللي فاتت مكنش هيبقى عندنا مخزون يكفينا وكنا ممكن نصحى الصبح منلاقيش عيش بسبب تعطل سلاسل الإمداد، ف وارد جدا أن العيش يغلي الفترة الجاية
كمان النقطة التانية وهو سعر البنزين لانه كل يوم بنشوف ارتفاع كبير في سعر البترول عالميا بسبب اخبار الحرب والنهارده السعر وصل ل ١٠٠ دولار ودا رقم محصلش من ٨ سنين وطبعا طبعا مصر والعالم كله هيتأثر بالأسعار دي، ف وارد جدا سعر البنزين والسولار يغلي وربنا يستر لانه بعدها كل حاجة بتعلي..
النقطة التالتة قطاع السياحة هيتأثر جداََ بسبب العمليات العسكرية وانخفاض رحلات الطيران وطبعا في مناطق في مصر بتعتمد على السياحة الروسية جداََ زي الغردقة وشرم الشيخ واللي كنا صدقنا ان السياحة بدأت ترجع تاني
النقطة الرابعة هو تراجع في البورصات العالمية بسبب القلق وحالة الهلع اللي بتصيب الناس اللي بتتداول في البورصة.
الحاجة االي ممكن نقول عليها إيجابية هي زيادة اعتماد أوروبا على الغاز المصري لان طبعا بسبب العقوبات الأوربية على روسيا واللي منها هيكون وقف خط غاز نوردستريم واللي البديل بتاعه هيكون الغاز القطري كمثال وطبعا الغاز المصري هيكون من ضمن البدائل المهمة اللي هتفكر فيه اوروبا وطبعا هيدعم مشروع مصر انها تبقى مركز إقليمي للطاقة..
للأسف وعلى الرغم من بعد المسافة بينا وبين أوكرانيا بس التأثير هيكون علينا بشكل كبير جدا وربنا يستر علينا في اللي جاي
تنسيقية شباب الأحزاب والسياسيين
التعليقات مغلقة.