قرار وزير الاوقاف بغلق صناديق التبرعات والصدقات !

.
نتكلم بيزنس عن قرار مختاي جمعة بالغاء صناديق الصدقات ؟
.
احنا بصدد سوق اسمه (( لله )) .. حجم السوق ثابت من ناحية تدفق الاموال .. ومتغير من ناحية المستثمرين ..
.
كانت زمان الصدقات دي بتروح بشكل مباشر للمحتاجين او لبيت المال .. مبقاش عندنا بيت مال .. لكن عندنا صناديق تبرعات وصدقات في المساجد .. وبكدا ضمننا ان فيه جزء بيروح للمحتاجين مباشرة وجزء تاني هيروحلهم عن طريق الدولة سواء لافراد او جماعات ( مشاريع خدمية خيرية وتنموية ) .
.
ظهر بعد كدا تطور ( بيزنس التسول ) .. التسول اخد شكل شركة ..فيها إدارة مالية و تسويق وادارة موارد و موارد بشرية و تخطيط .. إلخ .. والشركات او العصابات دي استقطعت جزء كبير جدا من الحصة السوقية ليك في سوق (( لله )) ..
.
بعدها ظهرت جمعيات الشحاتة .. الجمعيات الخيرية اللى برضو بتاخد شكل شركات (( وبتكلم عن الجمعيات اللي بتستنزف اموال المتبرعين مش الجمعيات المحترمة )) .. وفيه مليون علامة استفهام علي الذمة المالية لكل كيان منهم .. وبعضهم بياخد 90% من التبرعات والـ 10 % بيعمل بيها مشاريع حقيقية مساجد و آبار و نخيل وغيره .. فحصل استقطاع اضافي للحصة السوقية لينا في سوق (( لله )) ..
.
.
بعد كل الاستقطاعات دي .. واللي قطعا تزيد عن 90% من نتاج سوق (( لله )) .. كان المفروض مسئول مكان وزير الاوقاف يشوف طريقة لضمان حصول الوزارة علي الاموال كاملة .. بدل ما يقول احنا بيتم (( استلطاخنا )) وفلوس المتبرعين بتتسرق ..
.
سواء بقي عن طريق استبدال الصناديق القديمة بصناديق جديدة محصنة ضد السرقة ومقفولة ومتشمعة ومتتفتحش غير بلجنة ..
او ييجيلنا ونعمله صناديق بتعد الفلوس ومحدش يعرف يلعب فيها ومستعد اقدم الحل من خلال شركتي مجانا بالمناسبة ..
او اي طريقة تانية ..
.
.
لكن القرار (( العقيم )) دا بيدل علي عجز وزارة الاوقاف .. واحدة من اعرق الوزارات والدواووين المصرية .. عن ايجاد حل لمشكلة بسيطة ..
.
والانيل من كدا انهم مش بس تنازلوا عن حصة الصناديق دي من ناتج سوق (( لله )) .. لا دول استقطعوا الناتج النهائي للسوق دا .. لان ببساطة معظم دخل الصناديق دي بييجي من المصلي وهو لسة عامل طاعة وفي مكان طاعة وجو طاعة ويفتكر ان فيه 3 جنيه بيشخشخوا في جيبه ويفتكر اجر الصدقة فيخرجهم يحطهم في الصندوق ..

.
هيروح ازاى اخينا دا البنك يا استاذ مختاي علشان يتبرع بالتلاتة جنيه بعد كل صلاة وياخد بيهم ايصال ؟!