ليه ناصر امم القناة مع ان فاضلها كام سنة لانهاء الامتياز؟
.
انتشر بين العوام السؤال دا ؛ مع اتهام لعبد الناصر بالغباء والتسبب في العدوان الثلاثي ودفع مصر لتعويضات خيالية لمجرد التفاخر بنفسه .. بس خلينا نشوف بُعد تاني للموضوع ..
.
- كان باقي علي انتهاء الامتياز 12 سنة .. مش سنتين تلاتة.
- مصر خلال فترة الامتياز كانت بتاخد 5% بس من حصيلة القناة.
- وفقا للاتفاقية فبعد انتهاء فترة الامتياز كانت مضطرة مصر تدفع تعويضات عن المعدات والمنشات المستهلكة وغيرهم اللي هيخلفوها الخواجات وراهم في حال غادروا مصر.
كل دا يفهمك ان التأميم مع التعويضات افضل بمراحل من الاستمرار علي الوضع القائم ..وجون بان كالون الرئيس الفخري لجمعية (فرديناند ديليسيبس ) صرح قبل كدا ان مصر متأخرتش في سداد التعويضات وانها تم تأسيس الجمعية بيها لتخليد ذكري ديليسبس صاحب فكرة الحفر .. فمكانتش كبيرة بالشكل اللي ممكن تتخيله.
.
.
واحد يقوللي طيب هل دا كان يستحق المغامرة والتورط في حرب ؟!
ببساطة موضوع الحرب جه بغتة ومكنش متوقع اطلاقا .. ولو كنا متوقعينه فأه يستحق.. ليه ؟!
لان بريطانيا وفرنسا مكانوش هيسيبوا القناة بعد انتهاء الامتياز .. ايه الدليل ؟- الحرب نفسها دليل .. لو كانوا ناويين يسيبوها بالبساطة دي مكانوش اجتمعوا وعملوا خطة اجتياح وضربوا مدنيين وكلفوا نفسهم ملايين .. غير الخساير السياسية.
- اتفاقية القناة كانت بتقول ان بعد انتهاء الامتياز هيتم تقدير المبالغ المدفوعة من الجانب المصري نظير المعدات والالات بالتراضي .. طب لو محصلش تراضي ؟ يرجعوا للخبراء .. ودي مادة مطاطة بتكفل تأخير تسليم القناة.
- ادارة القناة بعتت تقارير للحكومة البريطانية بتشرحلها مخاطر تسليم القناة للمصريين.
- بدأت بريطانيا وفرنسا في حملة دبلوماسية لمحاولة مد امتياز القناة 40 سنة لكنها قوبلت بالرفض.
- حاولوا الدعوة لتدويل القناة واسسوا كيان اسمه ( جمعية السويس ) مكون من ساسة ودبلوماسيين و رجال اعمال للضغط علي الدول الكبيرة زي الاتحاد السوفييتي من خلال تخويفهم من عجز المصريين عن ادارة القناة.
.
.
وان كنت انتقدت طيش عبد الناصر في اكتر من موضع مسبقا .. لكن قرار تأميم القناة كان حتمي .. ومش قرار ساذج زي ما بيتم الترويج له في اوساط اللي مش مذاكرين تاريخ كويس ..
التعليقات مغلقة.