نصابين تطهير المقابر

.
انتشرت من فترة حملات لاغراب بيجوبوا قرى مصر بدعوى تطهير المقابر من السحر المدفون فيها ..
.
عادة بيتزعم الوفد عيل بيحط ازازة مية علي ايده وقال ايه بتميل لما يقرب من مكان السحر .. فيحفروا ويلاقوه ..
.
نصيحة محب .. لو الاشكال دى جت بلدكم انزل عليهم بالشبشب .. هم اللي دافنين الكلام دا وبيعملوا التمثيلية دي علشان يقلبوا ضعاف النفوس في فلوس من ورا الكاميرات .. كل اللي مقتنع انه مسحور او محسود او متنيل علي عينه بدل ما يلجأ الي الله بيلجأ ليهم خاصة في القرى اللي لسة فيها نسبة جهل عالية فيما يخص الغيبيات ..
.

اللى بيحصل انهم بيروحوا بلد ومبيطلبوش فلوس .. لانهم لو طلبوا فلوس هيتفضحوا ومحدش هيصدقهم .. ويطلعوا شوية اعمال هم اللي دافنينها ..
.
فتيجي ست هبلة بنتها اتأخرت في الجواز لان لسانها زفر ومقتنعة انها مربوطة .. ولا راجل عنده عيل اهطل مفكره محسود .. او حتي حد فعلا محسود او مسحور .. ويروحولهم لحد عندهم مكسورين وعندهم استعداد يعملوا اي حاجة علشان يتخلصوا من السحر والحسد .. وهنا بقي بتيجي السبوبة ..
الجني اللي هيخلص بنتك من السحر يا حاجة عايز يقعد اسبوع في مارينا .. ادفعليه ..
.
.

. النبي – صلى الله عليه وآله وسلم – نفسه معرفش مكان سحره الا لما سيدنا جبريل اخبره .. العيال دي اللي هتعرف ؟!
.
واللي بيقول مش نصابين دول مسخرين جن .. حبيبي الانسان مبيسخرش جن .. الجن اللي بيركب الانسان وبيسخره حتي لو الانسان فهم عكس كدا .. ومش مستوعب ازاى فيه حد يتخيل ان ممكن حد يمشي في معصية قد تصل بيه الي الكفر زي تسخير الجن ويستني منه انه ينفع الناس تقربا الي الله !!