نصب الجمعيات الخيرية

.
الأصل في الجمعيات الخيرية اللي بتعلن علي القنوات الاسلامية وحتي القنوات العادية انها (( نصابة )) حتي يثبت العكس ..

بيزنس مقرف .. بيقتاتوا علي كتاب الله واغراء اهل الخير بالطاعات .. ممكن الاعلان يستمر سنتين لجمع تبرعات لمسجد او سقيا ماء .

. المسجد محتاج 100 الف وبيجمعوا علشانه 10 مليون .. الـ 100 ألف تروح للمسجد و نص مليون للاعلانات .. ومليون لتكميم افواه شركاء النصباية .. والباقي في جيب زعيم العصابة ..
.
حدثني اخ عزيز وصاحب قناة فضائية انه يعرف واحد متزوج من 4 .. كل زوجة عاملها جمعية خاصة بيها مشهرة في التضامن علشان السبوبة تتضاعف ..
.
مفيش شيخ معتبر ظهر في الاعلانات دي الا وانسحب بعد فترة ..

الشيوخ كان بينضحك عليهم بعمل الخير .. حد زي الشيخ مسعد انور مثلا .. تراجع عن دعم الجمعيات دى بعد ما عرف حقيقتهم وتفرغ لادارة مستشفي خيري حقيقي ..
الموضوع مفضوح بين المشايخ علشان كدا مبقيناش نشوف مشايخ كبيرة ومشهورة بيقوموا علي الاعلانات دي ..

دلوقتي بقوا يجيبوا عيل لسة دقنه بتنبت ويلبسوه ثوب ازهري في مشهد وبعدين كاجوال في مشهد تاني ويقعد يتكلم بالاحاديث والايات في فضل الصدقة الجارية وسقيا الماء و و و ..
.
الموضوع كمان ابعد من كدا ..

دا بعض المشايخ الكبار تلقوا تهديدات بالقتل صراحة بعد ما بدأوا يتكلموا في الموضوع ويفضحوهم ..
.
مترموش فلوسكم في جيوب الناس دي .. الفقراء اولى بيها ..

وغالبا بنشوف في كل منطقة جمعية صغيرة مرتبطة بمسجد مكونة من عدد من رجال المنطقة عارفين فقرائهم ومحتاجيهم وبيقدروا يوصلولهم الصدقات والزكوات .. دول اهل الثقة واهل الفضل ..