ازاي تصنع تركيبة الكابرون لعلاج البقع السوداء في البشرة (الكلف) في صيدليتك
محدش كان مصدق اننا نقدر نستخدم امبولات الكابرون لعلاج الكلف لحد ما كتبنا مقال تفصيلي لشرح ازاي الكابرون هو من احدث العلاجات الفعالة لموضوع الكلف في مؤسسة pharmscientist ، المكان الي بيوفر دايما للصيدلي معلومات عن كل الأبحاث الجديدة في مجاله والهدف منه ان صيدليتك تقدم خدمات مختلفة تماما عن أي صيدلية تانية
بس كان ناقصنا نقول ازاي بنصنع التركيبة دي
هاتوا ورقة وقلم واكتبوا معايا
منتج الكابرون الموضعي للتخلص من الكلف الي هتصنعه في صيدليتك المفروض يحتوي على ٥% من الtranexemic acid (المادة الفعالة للكابرون)
طب امبول الكابرون تركيزه كام؟ تركيزه ١٠% لإنه بيحتوي على نص جرام في ٥ ملل محلول (اقسمهم على بعض واحسبها والتأكد بنفسك )
١٠% ده تركيز كبير احنا عايزين منتج يحتوي على ٥% بس هتعمل ايه؟ فيه حل بسيط جدا
هتجيب امبول الكابرون تضيف عليه ٥ ملل من الماء المقطر وبالتالي هيكون معاك في المنتج النهائي نص جرام من المادة الفعالة في ١٠ ملل محلول، وده تركيزه ٥% فعلا
طب ده صلاحيته هتكون ايه؟ غالبا هيبوظ بسرعة في أقل من أسبوع عشان كدا لازم تضيفله مادة حافظة بتركيز ١% بس يعني 0.1 جرام عشان التركيبة صلاحيتها تعلى لسنة وسنتين من غير مشاكل
طب هتقدم للعيان ١٠ ملل محلول كابرون في ايده؟ لا طبعا
استخدم امبولين واعمل ٢٠ ملل محلول وحطهم في ازازة سيرام صغيرة ٢٠ ملل وتستخدم مرتين يوميا
احسب تكلفتك وسعرك حسب الصيدلية موجودة فين ولو محتاج نصائح في التسعير أو البيع أنا معاك على طول ابعتلي أي وقت بس المهم تكون صيدلي
طب لو عايز اعمل التركيبة في صورة كريم للبشرة عشان يقعد على البشرة اكتر ويكون أكثر فاعلية؟ اكتب كومنت وادخل الجروب واعمل فولو وهقولك ممكن نعمل ده ازاي وايه المواد الحافظة الي ممكن تستخدمها في السيرام أو الكريم
التعليقات مغلقة.