خلوا بالكم من بناتكم

احذروا التكاتك

بنت عندها ٢١ سنة راجعة من شغلها بالليل في منطقة الفلكي بالإسكندرية حبت تركب توك توك تروح بيه منزلها فوجئت بثلاث شباب بتركب جنبها… البنت خافت وطلبت تنزل فوجئت ان أحدهم اخرج سلاح ابيض وهددها انه هيقتلها لو نطقت بكلمة… البنت الخوف شلها ومقدرتش تعمل حاجة الا انها تبكى يمكن تصعب عليهم ويتركوها.. بس تصعب على مين؟؟؟ ممكن الشيطان يرق لها إنما هولاء الهمج مش ممكن…. خدوها وتنابوا الاعتداء عليها… مش بس كده واحد كان ماسك الموبايل وبيصور عشان لو اتكلمت يفضحوها… يفضحوا مين؟؟ الشريفة العفيفة اللى تعرضت لأقصى انواع العنف من مجموعة من الكلاب.. بعد ما انتهوا منها فرجوها على الفيديوهات وهما بيضحكوا وقالوا لها لو اتكلمتى مصر كلها هتشوفك على النت ورموها فى الشارع بمنتهى القسوة … ابو البنت فضل يدور عليها زى المجنون اتاخرت فى عملها… فضل يدعى ربنا ان بنته ترجع… وبالفعل رجعت… ولكن رجعت أشلاء انسان… رجعت وهى محطمة رجعت بعد ما فقدت ادميتها… رجعت وهى بتتمنى الموت من أعماق قلبها وارتمت فى حضن ابوها تبكى وهى منهارة ومش قادرة تبص فى وشه… وقالت لابوها كلمة واحدة عاوزة حقى… صرخت وقالت عاوزة حقى… الاب خدها وطلع على قسم المنتزة وفرغوا الكاميرات وقبضوا على الاربع كلاب وتبين ان كلهم مُقيميين في منطقة المنتزه بالإسكندرية (يعني ده تشكيل عصابي عارفين بعض كويس)، وبمواجهة المُتهمين قدام بعض اعترفوا في التحقيقات بإرتكابهم الجريمة وارشدوا عن السلاح اللي استخدموه والموبايل اللي صوروا بيه البنت وهما بيعتدوا عليها، وقررت النيابة عرض البنت علي الطب الشرعي وحبس المُتهمين ٤ أيام علي ذمة التحقيقات..
اهي جريمة واضحة جداً ومُتهمين اعترفوا علي نفسهم والكاميرات موجودة وكله تمام مش محتاجة بقي مرافعات واستئناف وتضييع وقت علي الفاضي اتمني يتحكم فيها بـ أسرع وقت، ياريت القوانين اللي من ٥٠ و ١٠٠ سنة تتغير عشان الجرائم اتطورت وزادت وبقت أكثر خطورة وبشاعة.. ياريت بقا ردع… ياريت قصاص من المجرمين اللى ملوا الشوارع… منتظرين ايه عشان نغلظ القوانين…
منتظرين ايه والحشاشين وبتوع البرشام والصيع ملايين الشوارع..
حق البنت لازم يرجع ومفيش غير الإعدام لشوية الكلاب دول…