انتي يا حاجة الله يسترك .. انتى في مقام اختي الكبيرة ..
.
- مفيش شاورما بتتعمل في البيت .. شوية الخضار علي الفراخ دي اسمها فاهيتا ..
- حطي ام النشا علي أم خلطة الفراخ المقلية علشان تطلع مقرمشة ومتماسكة ومتفكش من اللحم ومتشربش زيت ..
- صلصة الكشري حطي لأمها معلقة سكر .. والله ما عيب .. دى من قواعد الطبخ اصلا انك تعادلي الحموضة بسكر ..
- السبانخ محدش بيطيقها من الجيل دا .. لو خلاص هتموتي وتعمليهالهم اخلطيها بجبنة واحشيها جوة سمبوسك ..
- البطاطس هاتيها قشرتها خفيفة وفاتحة .. دي بتاعة التحمير .. وقطعيها وسيبيها شوية في مية مغلية وخل وليمون وملح وشطة وبعدين حمريها .. متحمريش للعيال بطاطس طبيخ لانهم بياكلوا زيت بالبطاطس مش بطاطس متحمرة في زيت ..
- الفول مبيتهرسش .. اسمعي مني واضربيه في الخلاط … ولادك هيدعولك وهيدمنوه ..
- اتعلمي تعملي العجينة السحرية .. كبايتين دقيق علي كيس خميرة فورية و معلقة ملح واتنين سكر وكباية مية .. اعجنيهم لحد ما العجينة تسيب من ايدك .. تعملي بيها بيتزا ماشي .. حواوشي اسكندراني ماشي .. ترشي عليها سمسم وحبة البركة وتحشيها مربى وجبنة و عجوة وتبقى سناك خفيف كدا ماشي .. ماشية معاكي في اي مصلحة ..
- عندك اطفال صغيرين مبيشربوش اللبن ؟! اعمليلهم بليلة .. رز بلبن .. اتعلمي تعملي الباف باستري بشوية دقيق وزبدة ومعلقة ملح وسكر واعملي كمية خزنيها وكل شوية اعمليلهم ام علي .. بدل ام حمادة اللى بتعمليها بالعيش العادي دى ومقتنعة انها ام علي !!
- لو فكرتي تعملي لانشون في البيت بلاش تكتري البيض علشان هيطلع بيض .. البيض مهمته انه يطلعه مش مكتوم وانه مادة رابطة .. سيكة بيكنج باودر مع نشا هيعوضوكي عنه .. واهتمي بالبهارات اكتر من اهتمامك بكمية اللحمة لانك داخلة في منافسة مع اطياب وحلواني .. مش مع عبير اختك ..
- الجيل دا بيحب الجبنة اوى .. ومش مهم الطعم .. المهم تمط زى الاعلانات .. لما تتزنقي ارمي علي اي حاجة جبنة وارميها في الفرن .. هاتى شوية بطاطس مقلية حطي عليهم كاتشب وسيكة مايونيز وقلبيهم مع شوية جبنة وحطيهم في برام فخار صغير وعلي وشهم شوية جبنة حلوين كدا وارميهم في الفرن .. عهد مين دا ؟! ولادك هينزلوها ستوري علي الفيس بوك وهيكتبوا فوقيها ( امنا الرشاش اللى مبيفضاش )..
- الجبنة مستحيل تمط لو خرجتيها من الفريزر علي الشغل .. عايزاها تمط حطيها تحت رف الفريزر قبلها بليلة .. ومش مهم نوع الجبنة حلو ولا وحش .. دي التريكاية الوحيدة اللى هتخليها تمط.
- هقولك حركة كدا تعمليها .. اعملي اوردر من كنتاكي ( مع انه معفن ومعرفش ولادك بيحبوه علي ايه ) .. وقدميه علي انك انتى اللى عاملاه في البيت .. لو ولادك اتنمروا عليه وقالوا وحش مش زي بتاع كنتاكي .. انسي كل اللى قولته في المقال ده
- ومتأكليهمش بعد كدا غير بيض .. عيالك بيض يا حاجة ومهما عملتي مش هيعجب فريحي نفسك ..
التعليقات مغلقة.