سميتك غالبا هي ما يميزك عن باقي البشر
فمثلا نقول العالم فلان..والطبيبة فلانة..والملياردير الفلاني..والكاتب الفلاني..
يعني كل الصفات لا بد ترتابط باسمك..

وكل واحد كايخدم ويشقى فهاد الدنيا فقط من أجل ان يرتبط اسمه مع صفة من الصفات..

ولكن ولكن ولكن.. أول ما يسقط منك عند وفاتك هو هاد الاسم اللي ضربت عليه تمارة وجريت وجاريت سواءا فالحلال ولا فالحرام باش يقولو فلان بن فلان..

هو هاد الاسم اللي بعتي عليه دينك وآخرتك وانباطحت أشد انبطاح بالتفاهة والرذيلة باش تحقق الشهرة لهاد الاسم اللي بمجرد تطلع الروح كايسقط هو اللول..

هو هاد الاسم اللي عريتي عليه التضاريس ودرتي بيه تاريخ فكل المواقع الجغرافية في الواقع والمواقع الإجتماعية في المواقع باش تحققي الشهرة لهاد الاسم اللي غادي يسقط قبل بلوغها الحلقوم..

عند الموت يسقط المال والاهل والمكانة وكل الأمور الدنيوية ولكن قبلها ستجرد من اسمك كماتجرد الأم طفلها من ملابسه عند دخوله الحمام..

ماغاديش تنفعك مكانتك وجاهك ومالك وشهرتك ولو تكون ملك العالم غادي يبغيو يهزوك ويقولو هزو الميت او هزو الجثة.. بدون اسم.

غادي يبغيو يصليو عليك ويقولو دخلو الجنازة والامام يقول صلاة الجنازة جنازة رجل او جنازة امرأة.. بدون اسم.

غادي يدفنوك ويقولو قربو الميت شد معانا الميت حطو الميت.. بدون اسم .

سميتك سقطات فالدنيا وبعد مرور ايام وربما سنة كولشي نساك ولكن سميتك ماتسقطاتش فالآخرة لأنها المكان الوحيد اللي غادي يعيطوليك فيه بسميتك يوم يُجمع فيه الأولين بالآخرين.

الى كاتبغي سميتك خدم عليها.. ولكن خدم عليها باش تلصق بصفة الطيب فلان بن فلان يوم لن ينفعك فلان ولا علان.. جعلنا الله وإياكم من الأسماء المجهولة في الأرض المعروفة في السماء.

هنا يتخلى عنك اسمك الذي تعبت من أجله في الدنيا ويؤنسك عملك الذي عملته.. فأحسن مؤنسك..