السعي كمية متجهة مش قياسية ..
زى الازاحة كدا .. لو انت واقف في النقطة صفر .. وفضلت تلف حواليها في دواير وفي الاخر رجعتلها فانت الازاحة اللى عملتها = صفر ..
بالرغم ان المسافة اللى قطعتها كبيرة جدا جدا .. لكنها مش مهمة ومش هتفرق معاك في مكانك النهائي ..
.
.
علشان كدا بقولك اشتغل بذكاء .. خطط لحياتك بذكاء .. اتحرك بذكاء ..
الدنيا مش هتصقفلك علشان عملت مجهود كبير ..
.
.
مجهودات غبية جدا بيتم اهدارها بلا داعي .. بلا تخطيط .. بلا واقعية .. بلا نظر فى المآلات ..
.
تلاقي مثلا خريج كلية نظرية مثلا .. معرفش يشتغل .. يقول هاخد ماجيستير واشتغل بيه .. يخلص الماستر ميلاقيش شغل .. يقول هاخد دكتوراة اشتغل بيها .. يخلص الدكتوراة ويروح كل سنة في الوقفة اللى بتتعمل ادام وزارة التعليم العالي للمطالبة بتعيينهم !!
.
مجهود سنين ملوش اي ستين لزمة لو كان هدفه الشغل .. الجهاز الاداري متشبع .. عدد اللي معاهم دكتوراة زى الهم علي القلب ..
.
في حين ان لو الاخ دا كان وفر مجهوده و وقته و فلوسه في طريق تاني خطط له بحكمة و واقعية واستشار اهل الخبرة .. ساعتها قطعا كان هيبقي في مكان تاني ويخرج برا دايرة الاحساس بالمظلومية العقيمة دى ..
.
.
خد الكلام دا طبقه علي اي حاجة هتلاقيه شغال ..
الدين .. السعي في الاتجاه الغلط هيخرب اخرتك ..
العلاقات الاجتماعية .. السعي في الاتجاه الغلط هيجيبلك اكتئاب ..
التربية .. السعي في الاتجاه الغلط هيطلع عيالك مشوهين ..
.
ربنا بيقول ((قل هل ننبئكم بالأخسرين أعمالا الذين ضل سعيهم في الحياة الدنيا وهم يحسبون أنهم يحسنون صنعا ))
التعليقات مغلقة.