علي مذهب الامام .. أبي حنيفة النعمان .. اشمعني؟!

.
الحدوتة ببساطة بتبدأ مع تحول الدولة العثمانية من ولاية في خدمة دولة السلاجقة الى سلطنة علي يد عثمان بن أرطغرل..
.
عثمان علشان يحول مسمى الدولة من سلطنة لدولة خلافة كانت ادامه عقبة كبيرة جدا .. انه مش من قريش .. في حين ان الخليفة لازم يكون من قريش .. لاحاديث صحيحة كتير منها ( الناس تبع لقريش في هذا الشأن ) و ( الائمة من قريش ) وغيرهم من الاحاديث ..
.
الكلام دا هو قول جمهور علماء اهل السنة .. بل والشيعة كمان .. ومخالفش الكلام دا غير اتنين .. الخوارج والاحناف ..
الامام ابي حنيفة قالك الخليفة مش لازم يكون من قريش .. كفاية انه له يد علي الحرمين ..
.
فهنا آل عثمان اشتغلوا علي مسارين بالتوازي :-
1- اعتمدوا المذهب الحنفي مذهب رسمي للبلاد .. للخروج من مأزق القرشية.
2- لما وصلنا للحفيد التاسع سليم الاول جاب وثيقة بتثبت انتساب والدته لآل البيت .. والحقيقة معرفش مدي صحتها وان كانت مش مهمة اوى لان النسب بيرفع للاب مش الام ..
.
ولان مصر كانت تابعة للدولة العثمانية عملت بالمذهب الحنفي كمذهب رسمي للبلاد .. الكلام دا كان سنة 1500 وشوية .. ومن ساعتها وبقي يتقال عند عقد الزواج (( علي مذهب الامام أبي حنيفة النعمان )) ..