تعرفوا ان كان فيه مصري على سفينة تيتانيك ؟!

تعرفوا ان كان فيه مصري على سفينة تيتانيك ؟!
طب تعالوا نعرف الحكاية
من حوالي 5 سنين ما كانش حد يعرف أي تفاصيل عن انه كان فيه مصري على سفينة تيتانيك لحد ما صحفية شاطرة اسمها ياسمين سعد ، عملت بحث و تحقيق صحفي عنه ، رحلة البحث عنه أخدت منها ٣ سنين لحد ما وصلت لأحفاده و أهله و عرفت الحكاية

هنحاول نختصر بقدر الامكان ، الصحفية ياسمين بعد ما وصلت لأحفاده اللي بدأوا يحكوا الحكاية ، جدهم كان اسمه ( حمد حسب ) و كان بيشتغل ( مرشد سياحي ) ، وقتها كان اسمه ( ترجمان )
حمد كان بيجيد أكثر من لغة منها الإنجليزية و الفرنسية و بحكم شغله كان ليه معارف كتير من دول مختلفة ، من ضمن معارفه كان شخص انجليزي اسمه ( هنري هابر ) و كان قريب جدا من حمد و كان حمد بيعزمه دايما في بيته ، صاحبه ده اللي عزم حمد على رحلة تيتانيك الأولى .. و كان حمد هو العربي الوحيد في ال First Class
حمد حكي لأحفاده اللي أصغر واحد فيهم دلوقتي عنده 70 سنة انه في الليلة الرابعة لابحار السفينة و كان بيتمشى سمع خناقة في أحد الغرف الخاصة بطاقم السفينة و فهم منهم ان السفينة دخلت في جبل جليدي و انها خلاص بتغرق و انهم لازم يخلوا الناس بقوارب النجاة ، حمد راح لصديقه هنري و بلغه باللي سمعه و قاله انهم لازم يلحقوا يهربوا دلوقتي قبل ما الزحام يشتد ع القوارب .. ( المصري نبيه من يومه بردو )
صاحبه ما اقتعنش جه شاله بالغصب هو و زوجته و جرا بيهم لمكان قوارب النجاة ، رماهم في القارب هما الاتنين و نط وراهم و عشان القارب ما يزدحمش و يبقى فيه خطر انه يغرق بيهم قطع الحبل علطول بعد ما ركب ، بيقول ان القارب كان فاضي و كان فيه أقل من نص العدد اللي يركب فيه .. و بدأوا يجدفوا في عرض البحر بعيد عن السفينة اللي بتغرق و قال ان رقم القارب كان ( ٣ )
احفاده بيقولوا انه ما رجعش البيت الا بعد ٣ سنين من غرق السفينة ، لكن وصلهم جواب منه بعد أيام قليلة من ليلة الغرق بيقول فيه :
: ” من حمد حسب بعد السلام على الجميع صغير و كبير ، أنا طيب و بخير و بعافية و لا يمكنني أن اتواصل معكم في الوقت الحالي ، الخواجة و مراته بخير و بيوصلوا لكم السلام “

احفاده بيقولوا بعد ما رجع و سألوه كان فين طول ال ٣ سنين بعد غرق السفينة كان بيرفض يحكي .. و فضل سر لحد ما مات سنة 1965
دي صورته و صورة الرسالة الي بعتها لأهله من 119 سنه ..