من مصدر:

بمناسبة الحلقة اللي عاملها تامر عطوة كنانة عن التدمير المتعمد للآثار الإسلامية في السعودية أنا عندي حكاية شخصية عن الموضوع ده.

من كام سنة ربنا من عليا بعمرة..المهم سافرت العمرة دي ومعايا كل معدات التصوير اللي ممكن تعمل بيها فيلم احترافي بسيط زي الأفلام الوثائقية اللي بيعملها فريق صغير (أنا أحد هواياتي صناعة الأفلام على قدي)..المهم كنت عاوز أعمل وثائقي عن الآثار الإسلامية في مكة والمدينة.
واحد صديقي هناك قابلني وعرفني على شخص مقيم مهتم بالموضوع ده وعارف عنه معلومات كأنه موسوعة بشرية.
قابلت الشخص ده واتفقنا إننا ناخد يوم كامل تصوير في المدينة المنورة..ماكانش معايا تصاريح تصوير ولا أي شئ بس الكرو كنت أنا ومساعد تصوير يعني مش كرو كبير ومش هنلفت النظر..

اليوم ده كان من أغرب أيام حياتي لأن الراجل خدني في رحلة حسيت اني في فيلم دافينشي كود..مثلا تلاقيه ماشي معاك في الحرم وفجأة يقف ويزيح جزامة وقطعة كاربت تحتها وإذا بالبلاط فيه دايرة سودا مختفية..ويقول هنا كان يتوضأ الرسول صلى الله عليه وسلم بس السعودية طمست المكان ده وسوته بالأرض..
نروح مسجد قباء يشاورلي على علامة سوداء في السقف ويقول هنا تحت هذه العلامة صلى الرسول صلى الله عليه وسلم..كان عنده خريطة منقوشة في دماغة بكل الأماكن الأثرية اللي هدمتها السعودية..روحنا أماكن تاريخية اتحولت لمولات..واللي اتحول لشارع ..واللي حرفيا اتحول لمراحيض عامة..

يتضح تماما إن التدمير كان متعمد..ومش مجرد خوف من البدعة..لا..ده اخفاء وشطب لهذه المعالم من الذاكرة..يعني كان ممكن يهدمها بس يسيب يافطة أو علامة أن هنا كان هذا الأثر..لا..مسح من الذاكرة التاريخية للأمة تماما.. .تدمير شامل لكل لأماكن المشهور في القرآن والسنة.
المهم الراجل ده عرفني إن اللي قام بمعظم أعمال “تطوير” (تدمير) الحرم وهدم هذه المعالم مهندسين مصريين..وهما اللي سابو العلامات السودا دي كعلامات سرية للأماكن والمعالم اللي تم هدمها عشان هما ماكانوش راضيين عن التدمير ده..على حسب روايته

كمان فيه خرايط سرية للأماكن الأصلية اللي تم تدميرها واللي الراجل ده خدني في جولة عشان أشوف أهم الآثار الإسلامية وقد تحولت لمولات وبيوت ومدارس خاصة وباركنج. وفيه مجموعات اندرجرواند بتسجل وتأرخ الأماكن دي لأن التدمير مستمر.

المهم صورت كل هذه الأماكن وبتعليق الراجل عليها وتاريخها..وقلت له عاوزني أخبي وشك عشان مايحصلكش مشاكل بس الراجل قال لا..الموضوع ده مهم جدا بالنسبة له ومش فارقة معاه..واللي يحصل يحصل..

وفي نهاية الجولة روحنا دخلنا وصورنا حصن كعب بن الأشرف اليهودي..اللي هوا المعلم الوحيد اللي السلطات السعودية محافظه عليه وماهدمتوش لسبب ما!

وكمان طلعنا وصورنا غار حراء اللي مافيش مسلم مش مرتبط وجدانيا بيه..واللي تم اهماله عمدا والطريق ليه مليان زبالة (شوف الصورة) ولا يتم تنظيفه..والغار نفسه قايم عليه رجال باكستانيين متطوعين هما اللي بينضفوه بطريقة بدائية لدرجة انهم جايبين باب مكتب وعاملين “عرشة” جنبه عشان الناس تقعد تحتها في الشمس لأن مافيش استراحة في طريق الصعود له….قلبك يتحصر على مكان من أهم الأماكن الأثرية في الإسلام مهمل بشكل بشع ومافيش تليفريك أو أي وسيلة تطلع بيها إلا التسلق لساعتين لو كان فيك صحة!

حتى الكعبة..اللي هيا أهم مكان للمسلم واللي أي خبير فني أو أثري يقدر يقولك إن أي بناء طويل فوقها ده محاولة واضحة جدا لإخفائها بصريا..يعني ماينفعش تيجي جنب الأهرام بمتر وتبني ناطحة سحاب وعليها ساعة كبيرة لإن اللي جاي عاوز يشوف الهرم مش ناطحة سحاب.

المهم..أخدت الكاميرات والهارد درايف وعملت سكريبت مبدأي للفيلم وكنت حجزت الترانزيت بتاعي في طريق عودتي لأمريكا إني أقضي يومين في تركيا..و من خوفي على الهاردات اللي عاليهم الفيديوهات كنت حاطتهم معايا في شتطة الكتف مطرح ما اروح ..هما والكومبيوتر والكاميرتين الغاليين..

وقبل ما أسافر بساعات دخلت أنا وأصدقائي قهوة مصرية ولأول مرة ولسبب ما تركت الشنطة في سيارة صديقي لنخرج من القهوة ونجد أنه تم فتح السيارة وسرقة الشنطة بمحتواياتها بالهارد درايفز بالكاميرات..ورغم إن الكاميرات كانت غالية إلا إني حزني الأساسي كان على ضياع كل ما صورته لهذا الفيلم..قدر الله وماشاء فعل..

وطبعا كانت طيارتي الفجر وماكانش فيه وقت أو خبرة لعمل بلاغ أو محاولة استعادة الهارد درايفز..الحمد لله..

للأسف كل ماأروح مكان “أثري” في أمريكا اللي عمرها كله 10 سنين واشوف محافظين عليه ازاي وهوا أساسا مش أثري ولا حاجة أقول منهم لله اللي دمروا أهم معالم اسلامية وحولوها لمراحيض عامة وكأنهم في حرب حقيقة ضد أي مكان تاريخي للمسلمين لا يعوض بكنوز الدنيا كلها…منهم لله..هما والحرامي اللي ساب اسطنبول كلها ونشن على الهارد درايفز!

:240px;” marginwidth=”0″ marginheight=”0″ scrolling=”no” frameborder=”0″ src=”//ws-na.amazon-adsystem.com/widgets/q?ServiceVersion=20070822&OneJS=1&Operation=GetAdHtml&MarketPlace=US&source=ac&ref=tf_til&ad_type=product_link&tracking_id=315509-20&marketplace=amazon&region=US&placement=B08F58MXQG&asins=B08F58MXQG&linkId=4aa85a2c57f7ea4da9d6658dca64ff68&show_border=false&link_opens_in_new_window=true&price_color=333333&title_color=298be6&bg_color=ffffff”>