معلومة قانونية تهمك | لو اتقبض عليك و اوجه لك اتهام وقتها تعمل إيه وتتصرف إزاي ؟!!

تعال وانا اقول لحضرتك تعمل ايه وتتصرف ازاى :

١ – التزم الصمت ، وتجنب الدردشة الشفوية حول موضوع اتهامك قبل البدء فى التحقيق المكتوب.

٢- عند التحقيق معك بشكل رسمي عليك بالاجابات المقتضبة مثل (مش عارف – ماحصلش- مش فاكر)

٣- انتبه من تغيير طريقة السؤال، فمهما تغيرت صيغة السؤال لتكن إجابتك واحدة وثابتة.

٤- عند فض الاحراز (المضبوطات) ومواجهتك بها انكر أي علاقة لك بها.

٥ – النيابة مسؤولة عن اتهامك والتحقيق معاك وهي محايده تماما، بمعنى أن المحقق لا معك ولاضدك.

٦- المحامى ليس له أي دور إلى أن ينتهي التحقيق، ويقتصر دوره على مراقبة التحقيق وابداء الدفوع والطلبات في نهاية التحقيق، لكن انتبه فمحاميك يحدد طريقة دفاعه طبقا لما تبديه أنت بالتحقيقات.

٧- لو أثناء تفتيشك أو تفتيش منزلك تم أخذ أي شئ وملقتهوش فى النيابة أذكره فى اقوالك واتهم القائم بالتفتيش مباشرة بسرقته ولاتخف.

٨- لو تم التعدى عليك بالضرب أو السب أذكر ذلك أمام النيابة، ولو فيك اصابات اطلب عرضك على الطب الشرعي، وعموما هذا دور محاميك بعد التحقيق وإن كان من حقك طلب ذلك بنفسك.

٩- المواعيد مهمة جدآ… فمن حق الجهة اللى قبضت عليك تحتفظ بيك أقل من(٢٤)ساعة قبل عرضك على النيابة فتذكر توقيت القبض عليك؛ فإن زاد عن ال(٢٤)ساعة فالقبض باطل ومابني عليه بالكلية باطل؛ فتذكر المواعيد جيدا.

١٠- دايما أول سؤال بيبقى معاك محامي، هنا تجاوب بنعم وتذكر اسمه الثلاثى وتتمسك بحضوره وترفض حضور أي محامي تانى تندبه لك النيابة ولاتقلق النيابة ملزمة تحضر لك محاميك، ولو اصروا على انتداب محامي أرفض الاجابة على اسئلتهم وهذا حقك، كذلك الحال إذا تم ادارة التحقيق معك دون حضور محامي فمن حقق رفض الاجابة على اسئلتهم حتى حضور محاميك.

١١- السؤال الثاني بيكون هل معاك شهود نفى لو فيه شهود على واقعتك أو على القبض عليك وأنت متاكد انهم هيشهدوا معك أذكر اسمائهم، ولو مش متأكد قول كان فيه ناس كتير موجودة انما متقولش لا إلا لو فعلا مكنش فيه شهود.

١٢- إذا سؤلت عن الضابط فلان هل تعرفه، لو تعرفه قول آه والسؤال اللى بعده هيكون هل فيه بينك وبينه خلافات لو فيه قول ايوه متخافش لو قلت لا هيكون فيه سؤال بيقول ما تفسيرك لما سطره الضابط فلان فى محضره (يعنى بيقول عليك كدا ليه) هنا تجاوب بانه اكيد مطلوب منه عدد قضايا علشان كدا لفقلى الاتهام دا عشان يعمل أكبر عدد قضايا ممكن.

١٣- انتبه فلا يجوز تحليف المتهم، ولا ترهيبه، ولا ترغيبه، يعنى لو المحقق قالك طب تحلف قوله مينفعش تحلفنى، ولو قالك رد بدل ما هحبسك، قوله مينفعش تهددني، ولو قالك قول وانا اروحك غالبا بيضحك عليك.

١٤- من حقك تتابع كل اللى بيتكتب فى التحقيق على لسانك ، أو تقراءه في النهاية قبل ما توقع عليه ، ولو مكتوب كلام غير اللى أنت قولته اتمسك بتغييره او امتنع عن التوقيع .