يعني ايه الآشيه معدن و100 فل و 14

عامل إيه يا معلم ، الحمد لله ، “الآشيه معدن” ، “100 فل و 14”.

كلمة “الآشيه” يعني الصحة ، كان زمان بيتقال على الصحة “آشيه” ، حتى مادة العلوم في المدارس الإبتدائي كانت “علوم وآشيه” ، يعني علوم وصحة.

وكلمة “معدن” ، مش معناها حديد ولا معادن خااااالص ، دي كلمة من اللغة المصرية القديمة ، آه والله ، فكلمة “معدن” مصدرها كلمة “مدن” في لغتنا المصرية القديمة ، وكان معناها “هادىء” أو “مرتاح البال” أو “على مايرام”.
وبقت عبارة مصرية خالصة ، “الآشيه معدن” يعني الصحة تمام.

نيجي بقه لباقي العبارة “100 فل و 14 ” ، ( وناخد معاها عبارة “إبن 60 كلب”؟.
العبارات دي أصلها مصري قديم ، لإنه زمان جدنا العظيم ، المصري القديم كان لما بيرسم على جدران المعابد والمقابر ، كان بيقسم الجدار لشبكة مربعات وكان بيرسم الإنسان الكامل في 114 مربع.
أما الحيوانات اللي زي الكلب مثلا فكان بيرسمها فى 60 مربع.

ومن هنا جات العبارات دي :
عامل إيه؟
(الحمد لله 100 فل و 14).

تصدق فلان ده نصب عليا!
ده (فلان ده إبن 60 كلب)