الزوجة غير ملزمة بخدمة زوجها؟!

وهل واجب علي الزوج يجيب خادمة لزوجته؟!

.
كتير من الفتاوى القديمة مرتبطة بواقع عاشه فقهاء العصور المتقدمة .. مش مناسبة لعصرنا الحالي ..
وعادة بتكون مستندة الي اعراف مش نصوص .. وزى ماحنا عارفين العرف له مكانته في ديننا .. وممكن تتغير الفتوى بتغير البلد لتباين الاعراف ..
.
طيب تعالى كدا نشوف موضوعنا ..
المرأة مش ملزمة بخدمة زوجها .. و زوجها ملزم يجيبلها خادمة !!
لو بصيت للفتوى دى – خاصة الشق التاني – هتلاقيها مناسبة جدا للعصر العباسي اللي صدرت فيه .. كان سوق الجواري منتعش بسبب الفتوحات و طبيعي اي بيت يكون فيه جارية او اكتر تقوم بشئونه.. دي طبيعة المجتمع وقتها .. والستات كانوا في قمة الترف ..
والدليل علي كون الفتوى مرتبطة بزمانها ان ستنا فاطمة الزهراء كانت بتقوم بشغل البيت لوحدها حتي انها كانت بتطحن نوى البلح لحصان سيدنا علي .. لحد ما ربنا كرمها بجاريتها فضة النوبية اللي بقت تساعدها في شغل البيت. محدش قال لسيدنا علي واجب عليك تجيبلها جارية !!
.
ولو سألتني انا شخصيا بدين الي الله بإيه .. هقولك أدين ان الزوجة غير ملزمة بخدمة زوجها تكليفا ما دام لم يأمرها بخدمته .. لو امرها بقت ملزمة زى ما كان النبي بيقول لعائشة ( اطعمينا يا عائشة ) .. اما حوار الخادمة فدا كلام فارغ بمقاييس النهاردة.
.
طيب عرف مجتمعنا دلوقتي كدا ؟!
لا .. اطلاقا .. والله يا بنتي جوزك علي عينك يشتري جاريتين تلاتة لكن ما باليد حيلة .. لا فيه جواري ولا فيه فلوس .. وعلشان يشتري جارية محتاج يسافر اوروبية الشرقية وابقى تفي علي قبري لو رجعلك بيها و قعدتي في البيت ساعة علي بعضها !!
.
.
المشكلة الاكبر في تناول الفتوى دى ان الستات بتنقلها بدون تحقق .. وبيختاروا فتاوى دون فتاوى لخدمة موقفهم في النقاشات الهزلية اللى بيخوضوها علي السوشيال ميديا ..
.
طيب انتى عايزة كلام العلماء يبقي فاصل بيننا ؟!
ايه رأيك ان (( المذاهب الأربعة )) بتقول لا يجب على الزوج تحمل نفقات علاج زوجته .. الامام الشافعي بنفسه قالها صراحة (( لا يجب على الرجل أن يؤدي عن امرأته اجر طبيب او حجام )) ..
.
ايه رأيك في الفتوى دى ؟!
دا كلام المذاهب الاربعة .. مش شيخ ولا اتنين ولا حتي عشرة .. دا كلام جمهور اهل العلم .. وعلل العلماء فيها مش مرتبطة كمان بطبيعة زمان .. بدون دخول في تفاصيل المسألة علشان الوقت..
.
.
فهنا عايز نتفق علي نقطتين في غاية الاهمية :-
1- الدين اكبر من اننا نتكلم بجهل فيه للدفاع عن موقفنا في مناقشات عقيمة علي الفيس .. عيب اللي بيحصل دا !!
2- الحياة الزوجية مينفعش تتبني علي الحقوق والواجبات .. هي تقول مش منضفة وهو يقول مش معالج .. فتقوله هاخد اجرة علي ارضاع ولادك .. فيقولها طب مش هتشوفي الشارع الا وانتى في النعش .. ومش هنخلص بقي ..
الحياة الزوجية السوية لازم تتبني علي التفاهم والرحمة واللين .. البذل والعطاء والاحترام والايثار .. القوانين الشرعية اللى بتحدد الحقوق والواجبات اتعملت علشان نرجعلها لما خلاص نوصل لحيطة سد في خلافاتنا ..
.
فمن فضلكم .. نعقل ..