الفطير المشلتت
المقادير /
3 كوب دقيق
نصف كوب زبدة طرية
كوب ونصف ماء
ملعقة كبيرة سكر
رشة ملح
الطريقة /
فى بولة عميقة بنخلط الدقيق مع الملح والسكر ونضيف الماء بالتدريج لحد ما العجينة تلم معانا ونبدأ نعجنها بالايد لحد ما نحصل على القوام المطلوب وهو عجينة ناعمة وطرية وما بتلزقش فى الايد ونقطعها كور ونسيبها ترتاح شوية
بعد ما ترتاح بناخد كورة ونفردها كويس اوى بالزبدة ونرققها على قد ما نقدر لحد ما تبقى شفافة ونقفلها ظرف ونضيف لها سمنة ونركنها على جنب
وناخد الكورة الثانية ونفردها زى الاولى بالزبدة لحد ما تبقى شفافة ونضيف فى النص الكورة الاولى اللى عملناها ظرف ونفردها عليها ونرق الاطراف علشان ما تبقاش ناشفة ونقفلهم سوا على شكل ظرف ونسيبهم على جنب
وناخد كورة كمان ونعمل فيها زى ما عملنا فى الاولى والثانية وناخد الظرف فى النص ونفتحه ونفرده عليها ونقفلهم مع بعض ظرف ونسيبهم على جنب
وناخد الكورة الرابعة ونعمل معاها زى ما عملنا مع اللى قبلها بالظبط وبعد ما نقفل الاربع كور سوا على شكل ظرف بنطحها فى صينية مناسبة ونفردها كويس بحيث تملا الصينية كلها وناخد اخر كورة نفردها بالسمنة ونحطها على الفطيرة وننقفل الاطراف من تحت الفطيرة ونفردها تانى جيدا وندخلها الفرن على درجة حرارة 200 الى تمام النضج وتزين بالسكر البودرة وتقدم بالهنا والشفا 🙂
ملحوظة / بنضيف سمنة بوفرة فى كل مرة بنفرد فيها لان السمنة الكتير بتخلى الفطيرة تبقى مورقة معانا
وكمان لما يخرج ممكن نضيف بفرشه شوية سمنة سايحة عشان تلمع
التعليقات مغلقة.