ازاى توقف متنمر عند حده

.
التنمر ظاهرة قديمة جدا تم مناقشتها في كتب علم النفس الكلاسيكي .. وان كان استخدام لفظ ( التنمر ) مستحدث ..
قبل كدا كان بيتم وصف السلوك دا بـ ( سلوك السيطرة ) او ( عقلية الذكر المسيطر ) والمقصود هنا محاكاة سلوك ذكر القطيع القائد لفرض سيطرته..
.
التنمر هو وسيلة المتنمر فى فرض سيطرته واعلان نفسه بمنزلة اعلي من المتنمر عليه .. هو عايز يشعر بالعلو .. بالتوفق عليك .. بانه اقوى منك ..
.
والحل هنا انك تسلك طريق من اتنين :-
1- انت بالفعل اقوى منه ( مش شرط قوة الجسد ) .. فهنا انت قادر تبسط سيطرتك عليه وتثبتله انه هو اللى بمنزلة اقل منك .. مش من باب التعالي .. بل من باب الاية ( فعاقبوا بمثل ما عوقبتم به ). وهنا وجب التنبيه علي نقطتين .. العقاب بيبقي عليي قدر الخطأ في حقك .. ميبقاش واحد بيتنمر علي قميصك تقوم ضاربه بالرجل في بطنه .. والنقطة التانية تكملة الاية ( ولئن صبرتم لهو خير للصابرين ).
.
2- انت مش قادر علي رد اذاه بنفس الطريقة .. فهنا الخطأ الشائع اظهار الاستياء .. كفاية .. حرام عليك .. انت مبسوط وانت بتضايقني ؟! إلخ .. بقولك خطأ لاننا اتفقنا ان السلوك دا هدفه احساسه ببسط سيطرته .. وانت كدا بتديه اللى هو عايزه .. ولما يلاقي ان تنمره بيجيب نتيجة هيتمادي اكتر واكتر .. حتي ردك علي تنمره بتنمر مع اظهارك الضجر والاستياء هيوصلك لنفس النتيجة .. فالحل هنا انك توصله انه هو وكلامه مش فارقين معاك .. اشطة دا رأيك .. اكتبه في ورقة وابرمها وحطها في جيبك ..