خطر جدا انك متعرفش تقدَّر الـ Sunk cost

.
في البيزنس عندنا حاجة بنسميها الـ Sunk cost
هي ببساطة التكلفة اللى انت بتدفعها في بيزنس معين وغير قابلة للاسترداد في حال انك قررت تنهي البيزنس دا..
.
الخطورة هنا فين ؟!
الخطورة اننا عادة مبنحسبهاش مسبقا .. وبنتجاهلها .. وبنلغي عقولنا ونحط مكانها القلب الرهيف الهفأ ابو مشاعر ملهاش في صناعة القرار .. ازاي ؟!
.
مثلا .. زيد وعبيد كل واحد فيهم عمل محل ملابس تكلفته 100 جنيه .. والاتنين بعد كام شهر اكتشفوا انهم غلطانين ومحلاتهم بتخسر ومستحيل تحقق ربح ..
.
زيد عمل حسبته ولقي ان الـ Sunk cost بتساوي 20 جنيه .. خسر معاه Running cost بتساوي 5 جنيه متمثلة في ايجار وكهرباء ..
فلما هينسحب هيطلع ب 75 جنيه .. دا زيد .. كائن حي بيفكر بدماغه ..
.
عبيد بقي محسبش حسبته .. قال حرام المحل اصرف عليه شقى عمري وفي الاخر اقفله .. اسيبها تمشي زى ما تمشي .. واستمر زي ما هو .. يوم ورا يوم خسايره بتزيد لحد ما هيخسر الـ 100 جنيه كلها .. دا عبيد .. كائن حي وحيد الخلية .. طحلب معندوش دماغ اصلا !!
.
.
زيد وعبيد الاتنين خرجوا منها خسرانين ..
لكن زيد قلل خسايره الى اقل قيمة ممكن وسهل يبدأ تاني ..
اما عبيد فحلوف .. وكمان يومين هيجيب ورقة ويرسم شجرة عليها لاصحابه ويفهمهم ازاى يجيبوا عربية بي ام في 16 ساعة من النص الشبكي ..
.
.
شوفت الكلام دا بقي ؟!
تقدر تطبقه علي تعليمك .. لو حسيت انك مستمر في بذل مجهود في مجال مفيش وراه عائد .. في حين ان فيه مجال تاني متاح ادامك هتحقق من وراه مكاسب .. لو كملت هتخسر 4 سنين وقت وفلوس ومجهود .. انسحبت هتخسر سنة او اتنين وتبدأ من جديد تجربة تانية بإذن الله تكون ناجحة.
.
تقدر تطبقه في علاقاتك الاجتماعية .. ولو كل المتجوزين اللى حصلت بينهم خلافات انتهت نهايات مأساوية فكروا بالطريقة دى كانوا انسحبوا في الوقت المناسب واكتفوا بقليل من الخساير علي امل الابقاء علي الود و صيانة العشرة والتراحم بينهم ..