.
حملات مقاطعة السلع لارتفاع الاسعار هتبقي فعالة جدا لو كان ارتفاع السلع سببه جشع التجار ..
.
لكن لو كانت السلع ارتفعت بسبب ارتفاع مدخلات الانتاج فاللي هيحصل ان السلع هتنخفض مؤقتا لاختلال ميزان العرض والطلب و رغبة كل مورد في التخلص من بضاعته قبل بوارها خاصة البضائع اللي مينفعش تتخزن زي البيض او قيمتها بتقل بالتخزين زي اللحوم او اللي تكلفة تخزينها عالية ..
.
بعدها السوق هيشوف موجة تانية اشد من ارتفاع الاسعار لانسحاب عدد من الموردين بعد الخسارة ودا معناه ان مش بس مدخلات الانتاج لسة غالية .. لأ دا كمان كمية المعروض من السلعة هينخفض ودي مشكلة اضافية.
في بداية كل موجة ارتفاع اسعار .. بنلاقي سلوك جمعي سىء جدا منتشر هنا في مصر .. الكل بيجري علي السلع يلحق يلم اللي يقدر عليه لانه خايف تزيد اكتر .. ودا بيزود المشكلة اكتر واكتر ..
.
مش كدا وبس .. داحنا كمان داخلين علي موسم رمضان .. ودا موسم انتعاش لحركة المشتريات بامتياز .. خاصة السلع الغذائية .. وطبيعي ان الاسعار بتزيد فيه لزيادة معدلات الطلب مع بقاء العرض زي ماهو ..
.
زيادة الاسعار في الوقت الحالي طبيعية جدا .. والسبب المعتاد بتاعها السلوك الاستهلاكي الخاطىء للناس .. فيه اسباب جديدة جدت السنادي زي ارتفاع مدخلات الانتاج المستوردة بسبب الحرب .. وملهاش حل غير تغيير الثقافة الاستهلاكية للشعب مع رقابة صارمة من الجهات الحكومية المسئولة عن مراقبة الاسعار في السوق ..
التعليقات مغلقة.