.
بما ان الناس بقيت بتسأل كل شوية عن النقيب الجديد م. طارق النبراوي وهل هيرفض تسجيل خريجي الخاص في النقابة ولا لا ..
.
ابتداءا م. النبراوي كان علي رأس القايمة اللي جت اطاحت بمجلس الاخوان .. فهو مش جديد ولا حاجة .. وفي عهد اتفتح موضوع بيزنس المعاهد علي البحري .. وكانت فرصة للمجلس وقتها لسد العجز في الميزانية (( اللي اول مرة يحصل )) خاصة بعد كسر وديعة المعاشات ونفقات نادي اكتوبر ..
.
ثانيا خلينا متفقين ان اغلاق المعاهد الخاصة مصلحة لطالب حكومي وخاص .. طب طالب حكومي وعارفين السبب .. طالب خاص مصلحة له ليه ؟!
.
لانه بعد ما يتخرج ويبقي مهندس خلاص هتستمر المعاهد دي في شحن السوق باعداد كبيرة من المهندسين .. ودا هيزود مشكلة سوق الهندسة وقطعا هتأثر عليه . فلو وقفت التدفقات دي واكتفينا بالحكومي وقللناهم كمان الدنيا هتتظبط او علي الاقل مش هتسوء اكتر .. والكلام دا علي الحكومي والخاص .. الاتنين ..
.
طيب هل المجلس الحالي هيلغي عضويات الخريجين السابقين وهيرفض انتساب الخريجين الجدد ؟!
موضوع فصل عضو نقابي دا مضحك جدا .. خلينا اعقل من اننا نناقش حاجة زي دي .. اما بقي موضوع رفض انتساب خريجين جدد فخليني افكر معاك بصوت عالي ..
بغض النظر انه لا يملك الصلاحية لرفضهم .. لكن خلينا نقول انه يقدر .. لو عمل كدا هيلبس مرتين :-
1- مرة بسبب العجز اللي هيحصل في الميزانية نتيجة خسارة ملايين من الاشتراكات الجديدة.
2- مرة بسبب الانتخابات .. حاليا خريجين الخاص تقريبا عددهم قد الحكومي ويمكن اكتر .. وقطعا في اخر 10 دفعات عددهم اكبر بكتير من الحكومي (( كل مهندس حكومي بيتخرج ادامه 3:4 مهندسين خاص )) .. تفتكر حد بينافس في معركة انتخابية ممكن ياخد اجراء يخليه يخسر الكتلة التصويتية دي ويحكم علي نفسه بانهاء مسيرته داخل النقابة ؟! انا مفتكرش ..
.
.
يا صديقي .. تعرف ان سنويا بيجيلي عدد كبير من الطلبة اللي بيدرسوا هندسة في روسيا و اوكرانيا .. منهم كويس فعلا ومنهم اللي مبيعرفش يجيب طول وتر المثلث ودخلها من ادبي و بـ 50% ..
طب تعرف ان الطلبة اللي راجعين من اوكرانيا وارد جدا يتعمل معاهم زي ما اتعمل مع الطلبة المصريين في اليمن لما قامت الثورة واللي كانوا بيدرسوا طب هناك بمجموع ميدخلش معهد دولسي هنا ؟! عارف حصل معاهم ايه ؟!
.
الحكومة وزعتهم علي كليات الطب (( الحكومية )) ..
التعليقات مغلقة.