هو الترامادول إدمان يا دكتور ؟؟
بالتأكيد الترامادول إدمان
ازاي تعرف انك بقيت مدمن ترامادول ؟

لما تلاقي الجرعه اللي بتاخدها ما بقتش تكفيك و مضطر تزود في الجرعه عشان تاخد نفس التأثير يبقى انت كده بقيت مدمن ترامادول.

2- لما تلاقي نفسك لما بتبطل ترامادول بيجيلك آلام لا تُحتمل في كل جسمك و بالذات مفاصلك و أسفل ظهرك يبقي انت كده بقيت مدمن ترامادول.
3- لما تلاقي نفسك عندك رغبة قهرية إنك لازم تنزل تشتري الترامادول و بتضطر تعمل أي حاجه لدرجة إنك تسرق أو تسيب أهلك جعانين عشان تروح تجيب ترامادول يبقي انت كده بقيت مدمن ترامادول.

4- لما تلاقي نفسك من أول ما تصحي لحد ما تنام كل تفكيرك في حاجه واحده بس هي ازي تجيب ترامادول و سايب اي حاجه تانيه في حياتك يبقي انت بقيت مدمن ترامادول.

ما هي آثار الترامادول على الجسم ؟؟
“و المقصود هنا اللي يستخدمون الترامادول لفترات طويلة”:
1- الدوخه المتواصله و ضعف التركيز و عدم القدرة على تقدير المسافات.
2- الشعور بالإرهاق والخمول والضعف العام.
3- اضطرابات النوم والأرق الشديد.
4- العصبية الزائدة والسلوك العنيف.
5- وجود رعشة لا إرادية في بعض أجزاء الجسم تصل لحد التشنجات العنيفة.
6- الغثيان والقيء وعسر الهضم.
7- فقدان الشهية و نقص الوزن.
8- جفاف الفم والشعور بالعطش.
9- فقدان الوعي.
10- عدم القدرة على التنفس.
11- الهلاوس السمعية والبصرية.
12- تسارع ضربات القلب.
13- خلل في وظائف الكبد والكلى.

علاج إدمان الترامادول ؟؟
مرحلة سحب الترامادول من الجسم “الديتوكس”
في المرحله دي المريض يقدر يتخلص من الإدمان الجسدي للترامادول و الأفضل أن المريض يتحجز و يبقى تحت إشراف طبي كامل و ده بسبب أعراض الإنسحاب اللي قلناها قبل كده.
في المرحله دي بنوقف الترامادول تماماً و بنتحكم في أعراض الإنسحاب من غير ألم خالص و بيبقي الجسم في الفترة دي اتخلص من الإدمان الجسدي للترامادول بمعنى أن الجسم خلاص ما بقاش محتاج الترامادول عشان يسكن الآلام.

مرحلة إعادة التأهيل “من 6 شهور الى سنه”
و دي مرحلة التخلص من الإدمان النفسي للترامادول بمعنى إن مريض الترامادول متعرض في أي وقت انه يحصله “انتكاسة” يعني يرجع لإدمان الترامادول مرة ثانية و هنا بييجي دور الطبيب النفسي اللي بيشتغل مع المريض برنامج اسمه “العلاج المعرفي السلوكي” عن طريق البرنامج ده المريض يقدر يتخلص من الإدمان النفسي للترامادول و بيقدر يتعامل مع المجتمع بطريقة سليمة و بتتغير مفاهيم المريض و بيقدر يواجه الحياه بطريقه جديده وافكار جديده

الأهم من العلاج اننا نحمي نفسنا وأولادنا من انهم يقعوا فيه من الأساس … لازم يبقي في رقابه من البيت و لازم نقوي الدافع الديني عند ولادنا من صغرهم و نعرف مين صحابهم ونبعدهم عن العزلة و ربنا يحفظنا و يحفظ أهالينا و شبابنا من خطر الإدمان.