حرمة البتكوين والعملات المشفرة ..

.
بمجرد ما اذكر رأي الازهر بيتقال الكلام دا :-
.
1- اللى بيقول كدا ميعرفش اصلا يعني ايه بيتكوين.
بغض النظر عن ان اللي بيقول كدا غالبا ميعرفش حاجة عن التداول ولو يعرف فأخره ذاكر ستراتيجي او اتنين مع 2 من ادوات التحليل (( الاحصائي البحت )) ومفكر نفسه خبير .. لكن انا اهو يا باشا .. مفيش مرة توقعت فيها ارتفاع او انخفاض في اطار زمني معين الا واتحقق كلامي بالحرف والبيدج والبروفايل موجودين!! فبلاش عبث.
.
2- بس الازهر ميعرفش حاجة عن البيتكوين!
للحكم علي البيتكوين واخواتها انت محتاج علم بالاقتصاد وعلم بالدين .. وفي الغالب الاتنين مش عندك .. اما الازهر اللي ميعرفش حاجة عن البيتكوين ففيه كليات تجارة وفيه علماء اقتصاد ومحاسبة وبنوك معظم رسايل الدكتوراة بتاعتهم و بحوثهم في اسقاط القواعد الفقهية علي المستحدثات .. او اللي بنسميه الفقه المعاصر ..
.
3- بس الازهر حرم العملات المشفرة علشان الحكومة هي المتضررة ولو كانت الحكومة هتكسب كان اعتمدها.
بغض النظر عن ان دا تصور عقيم .. لكن الشريعة اصلا ليها خمس مقاصد بتحفظهم( الدين – النفس – العرض – المال – العقل ) .. فلما تقوللي الازهر بيحرمها علشان هتضر بالاقتصاد والفلوس هتدخل وتخرج محدش يعرف عنها حاجة .. فدا سبب منطقي .. ولو انت مش شايف انه منطقي تبقى مصيبة.
.
4- لا مش كدا .. اصل الحكومة مش هتبقي ليها سيطرة علي العملة!
ماهي لو مبقاش ليها سيطرة علي العملة هينهار الجهاز المصرفي الخاص بيها .. العملات المشفرة – بلا شك – بيتحكم فيها اشخاص ومؤسسات .. على سبيل المثال جون مكافي .. بتويتاية منه كان بيرفع سعر عملة السماء وبيخسف بسعر عملة الارض .. وكان بياخد فلوس من اطراف معينة لدعم عملات بعينها .. انت عايز اقتصاد بلدك يبقي بالهشاشة دي ؟!
.
5- طب ما فيه دول سمحت بالتعامل بيها؟!
يبقي تفهم من كدا انها قدرت بشكل او بآخر -على الاقل-تحتويها. انا ذكرتلك مثال لشخص مفيش حد في عالم الكريبتو ميعرفوش وميعرفش تلاعبه في العملات .. فما بالك بالدول اللي احترفت استغلال الازمات بل واختراعها للاستفادة منها؟!
.
6- لا اصل كدا الحكومة مش هتحصل ضرايب.
فعلا .. عندك حق .. بس في نفس الوقت ضبابية حركة الاموال دي كارثة ..
هتكتشف ان موظف خد رشوة ازاى ؟ هتضمن ازاي ان الفلوس تفضل جوة البلد متتسربش ؟! هتلاحق على عدد المستريحين الضخم اللي هيظهر ازاي واللى كانت مشكلتهم قبل كدا في انهم بيلموا فلوس وميعرفوش يحطوها في بنوك وغالبا مبيعرفوش يهربوا بيها برا البلد في الوقت اللي اي حد ممكن يلم فلوس فيها من بلد و يسحبها من محفظته من بلد تانية ؟!
.
7- تبقي المشكلة في عدم تنفيذ القوانين مش في العملة!
يا سلام .. طب ما اللي بيسرق بيتحبس .. هل دا منع السرقة ؟! اللي بيقتل بيتعدم .. هل دا منع القتل ؟!
متجيش انت بقى تسهل حركة الفلوس بين الدول فتزدهر تجارة المخدرات اكتر ما هي مزدهرة و جرايم الجـ.ـنـ.ـس والارهاب والسلاح و كل حاجة قذرة في الدنيا !!
.
.
بص يا بيه ..
لو انت مش عارف .. فاعتقد انا جمعتلك الردود على الاسئلة المتكررة في المقال دا ..