تاريخ المسجد الأقصى من بدايته حتي الآن

بواسطة Tapias Perez آخر تحديث ديسمبر 28, 2022

أول القبلتين وثالث الحرمين الشريفين ومسرى نبينا ومنه كان معراجه للسماء والصلاة فيه تعادل 500 صلاة.

مقال مفصل وطويل عن تاريخ المسجد الأقصى من بداية نشأته لحد انهاردة وتصحيح المعلومة المغلوطة عن ان مسجد قبة الصخرة غير المسجد الأقصى ( اللي هي أصلاً هدف الاحتلال يعني اللي بيردد النغمة دي بيحقق هدفهم بدون علم) وتوضيح أنه جزء منه و توثيق قرار منظمة اليونسكو اللي استندت على المعلومات التاريخية دي وأعلنت ان المسجد الأقصى مقدس إسلامي ليس لليهود أي حق فيه.

وتوثيق بالصور وشرح لكل معلم من معالم المسجد الأقصى تحت كل صورة اللي تجاوزوا السبعين صورة وكأنك في زيارة للمسجد الأقصى في القدس المحتلة.

يعني المفروض تعمل شير للمقال ده الأول وبعدها ترجع تقراه على رواقة لأنه محتاج وقت كتير وتركيز.

أرجو الناس تحتفظ بالمقال ده وتقراه كويس وتنشره قدر الإمكان لأني للأسف لاحظت جهل منتشر ومعلومات مغلوطة وانعدام معرفة كتير بمكونات ومعالم وتاريخ المسجد الأقصى.

لدرجة تلاقي تنظير من بعض مدعي العلم لما حد ينزل صورة فيها مسجد قبة الصخرة ويخش يتريق عليه ويقوله ايه ده انت مش عارف الفرق بين مسجد قبة الصخرة والمسجد الأقصى ولا إيه؟ في حين ان أصلاً مسجد قبة الصخرة هو جزء من مكونات المسجد الأقصى زي ما هنوضح مع بعض دلوقتي فهيا نشد الرحال لجولة تاريخية في رحاب مسجدنا الأقصى

المسجد الأقصى مكانه داخل البلدة القديمة في مدينة القدس في فلسطين.

وهو كامل المنطقة المحاطة بالسور واسم لكل اللي داخل سور المسجد الأقصى والواقع في أقصى الزاوية الجنوبية الشرقية من البلدة القديمة المسورة في القدس المحتلة.

تبلغ مساحته قرابة 144,000 متر مربع، وبيشمل بداخله مسجد قبة الصخرة والمسجد القِبْلي والمصلى المرواني ومصلى باب الرحمة، وشوية معالم كتير يصل عددها ل 200 معلم هتلاقوا تفاصيلهم وتاريخهم في الصور المرفقة.

والمسجد الأقصى بيقع فوق هضبة صغيرة اسمها هضبة موريا.

وزي ما وضحت في مقال هيكل سليمان المزعوم اللي هسيب اللينك بتاعه في أول تعليق أنه اليهود بيقدسوا نفس المكان وبيطلقوا على ساحات المسجد الأقصى اسمَ “جبل الهيكل” نسبة لهيكل النبي سليمان المزعوم عشان كدة بتُحاول العديد من المنظمات اليهودية المتتطرفة التذرع بالحجة دي وغيرها لهدم المسجد الأقصى وبناء الهيكل حسب مُعتقدهم اللي وضحناه في المقال للي قراه…ودي كانت سبب اقتحام المسجد الأقصى يوم 28 رمضان اللي فات واندلاع الأحداث في فلسطين كلها.

نرجع لمسجدنا الأقصى وتعالوا نشوف ليه اتسمي بالاسم ده ؟

كلمة “الأقصى” معناها الأبعد، واتسمِّيَ الأقصَى لبعد المسافة بينه وبين المسجد الحرام.

لأنه كان أبعد مسجد عن أهل مكة في الأرض يعظَّم بالزيارة.

اللي سماه كدة حسب عقيدتنا الإسلامية هو الله في القرآن الكريم في أول آية في سورة الإسراء اللي بتقول :

﴿سُبْحَانَ الَّذِي أَسْرَى بِعَبْدِهِ لَيْلاً مِّنَ الْمَسْجِدِ الْحَرَامِ إِلَى الْمَسْجِدِ الأَقْصَى الَّذِي بَارَكْنَا حَوْلَهُ لِنُرِيَهُ مِنْ آيَاتِنَا إِنَّهُ هُوَ السَّمِيعُ البَصِيرُ﴾

كمان معروف عندنا باسم بيت المَقْدِس وده الاسم اللي كان متعارف عليه قبل ما يطلق عليه اسم “المسجد الأقصى” في القرآن الكريم، وهو الاسم المستَخدَم في معظم أحاديث النبي زي اللي قاله يوم الإسراء والمعراج:

«ثم دخلت أنا وجبريل عليه السلام بيت المقدس فصلى كل واحد منا ركعتين»

زي ما قلت في البداية ناس كتير بتعتقد أن المسجد الأقصى هو بس الجامع المبني جنوب قبة الصخرة (المصلى القبلي)، وهو اللي بتقام فيه الصلوات الخمسة دلوقتي للرجال.

وللأسف الاعتقاد ده نتيجة محاولات الاحتلال الإسرائيلي الصهيوني للسيطرة على أجزاء من الأقصى أو تدميره.

والصحيح أن المسجد الأقصى هو اسم لجميع المسجد وهو كل ما هو داخل سور المسجد ويشمل الساحات الواسعة، والجامع القبلي وقبة الصخرة والمصلى المرواني ومصلى باب الرحمة والأروقة والقباب والمصاطب وأسبلة الماء والحدائق وتحت أرض المسجد وفوقه وغيرها من المعالم، وعلى أسواره المآذن.

والمسجد كله غير مسقوف ما عدا بناء قبة الصخرة والمصلى القبلي الجامع.

الكلام ده مش كلامي ده الي اتفق عليه العلماء والمؤرخين.

وبما أننا جبنا سيرة المؤرخين فتعالوا نستعرض سوا وبهدوء كدة تاريخ المسجد الأقصى ومين بناه ومراحل التجديد والاعمار والتجديد اللي مرت عليه لحد انهاردة.. التاريخ عامة هو جزئي المفضل.. فيللا بينا.

ورد في أحاديث النبي بأن بناءه كان بعد بناء الكعبة بأربعين سنة.

فعن أبي ذر أنه قال:

«قلت: يا رسول الله! أي مسجد وضع في الأرض أول؟
قال: المسجد الحرام.
قلت: ثم أي؟
قال: المسجد الأقصى.
قلت: كم بينهما؟
قال: أربعون سنة».

و اختلف المؤرخين في مسألة الباني الأول للمسجد الأقصى فمنهم اللي قال الملائكة، أو النبي آدم أبو البشر، أو ابنه شيث، أو سام بن نوح، أو النبي إبراهيم.

ويرجع الاختلاف للاختلاف أصلا في الباني الأول للكعبة.

لكن الباحث عبد الله معروف رجح بأن آدم هو اللي بنى المسجد الأقصى البناء الأول، واستمد كلامه ده من رواية عن سيدنا عبد الله ابن عباس.

وده اللي رجّحه الإمام ابن حجر العسقلاني في كتابه فتح الباري.

مرت السنين واهمل المسجد الأقصى ومبقاش حد بيقدسه ولا بيهتم بيه وظهر بني إسرائيل من نسل يعقوب بن إسحاق ابن إبراهيم وظهر بعدها موسى بالديانة اليهودية وبعد موسى ظهر بينهم داوود وابنه سليمان.

حسب المؤرخين فتح النبي داود ومعه بني إسرائيل مدينة القدس او أورشليم سنة 995 ق.م.

فَوُسْع المدينة وعمّر المسجد الأقصى.

بعدها استلم الحكم ابنه سليمان، فعمّر المسجد وجدّده مرة تانية .

وده اللي خلى اليهود يقولك طالما سليمان نبينا وابننا جدده يبقى بتاعنا وأطلقوا عليه اسم “هيكل سليمان”.

المهم أنه بوفاة النبي سليمان، انتهى حكم بني إسرائيل اللي دام 80 سنة بس… وحتى بعض المؤرخين بينفوا حاجة زي دي أصلا وأنه مكانش فيه حكم ليهم على القدس.

المهم فضلت القدس وفلسطين كل شوية حد ييجي يحتلها شوية وييجي حد غيره يطلعه منها لحد ما احتلّ الإغريق أراضي فلسطين، وخضعت للإسكندر المقدوني (حوالي عام 332 ق.م).

بعدها احتلها خلفائه البطالمة، بعدها السلوقيين، وبعدها خضعت لحكم الإمبراطورية الرومانية، وكان من أوائل الحكام وأبرزهم اللن عينهم الرومان لحكم القدس الحاكم هيرودس (حوالي عام 37 ق.م).

وده اللي قام بتجديد بناء بيت المقدس (حوالي عام 20 ق.م)، بعدها أقام قلعة عظيمة بباب الخليل (بيطلق عليها اليhود دلوقتي اسم “قلعة داود”).

ولو لاحظنا أننا وصلنا لاعتاب ميلاد المسيح عيسى بن مريم واللي ب تذكر المصادر الإسلامية عن الفترة التاريخية دي انها اللي تم فيها بعثة النبي عيسى بن مريم، وزكريا وابنه يحيى بن زكريا لبني إسرائيل في القدس.

سيدنا يحيى كان بيوعِظُهم داخل المسجد الأقصى، زي ما ذكر الحديث النبوي:

«فجمع يحيى بن زكريا بني إسرائيل في بيت المقدس حتى امتلأ المسجد فقعد على الشرف فحمد الله وأثنى عليه ثم قال إن الله أمرني بخمس كلمات أن أعمل بهن وأمركم أن تعملوا بهن..».

كمان الإنجيل في العهد الجديد ذكر أن عيسى بن مريم أنكر على بني إسرائيل انحرافهم عن عبادة الله تعالى داخل المسجد الأقصى، وتحويلهم إياه لمكان للبيع والشراء!

وبعد النبي عيسى بن مريم بحوالي 300 عام، انقسمت الإمبراطورية الرومانية للإمبراطورية الرومانية الغربية في الغرب، والإمبراطورية البيزنطية في الشرق، وبقيت الإمبراطورية البيزنطية هي المُسيطرة على القدس، فأصبحت القدس مدينة مسيحية وبنوا فيها كنيسة القيامة.

أما المسجد الأقصى فسابوه زي ما هو دون بناء.

وفي عام 614 احتل الفرس مدينة القدس بمعاونة اليhود، وذلك بعد حرب طويلة ضد البيزنطيين الروم، وده وقع في الفترة اللي بُعث فيها النبي محمد في مكة واتذكرت الهزيمة دي في سورة الروم في القرآن.

لكن بعدها اتحقق الوعد القرآني في سورة الروم

( الم ۝ غُلِبَتِ الرُّومُ ۝ فِي أَدْنَى الْأَرْضِ وَهُم مِّن بَعْدِ غَلَبِهِمْ سَيَغْلِبُونَ ۝ فِي بِضْعِ سِنِينَ لِلَّهِ الْأَمْرُ مِن قَبْلُ وَمِن بَعْدُ وَيَوْمَئِذٍ يَفْرَحُ الْمُؤْمِنُونَ .

و عاد البيزنطيون الروم ل لحكم سنة 624، وفي الفترة دي أرض المسجد الأقصى بقيت مكب للنّفايات، وده انتقامًا من اليhود، لأن الصخرة المُشرفة داخل المسجد الأقصى قبلة ليهم.

لو جينا للمسلمين الفترة دي هنلاقي أنه كانت فيه أهميّة خاصة للمسجد الأقصى في عهد النبي استمرت لحد دلوقتي.

فكان القبلة الأولى للمسلمين بعد هجرة النبي محمد للمدينة المنورة عام 1 هـ الموافق 622م.

المسلمين كانوا بيتوجّهوا للمسجد الأقصى في صلواتهم، وفضلوا كدة مدة 16 شهر تقريبًا.

لكن النبي كان حابب أنْ يُوَجِّهِ وجهه للكَعبةِ، فأنزل اللّه تعالى :

” قَدْ نَرَى تَقَلُّبَ وَجْهِكَ فِي السَّمَاءِ فَلَنُوَلِّيَنَّكَ قِبْلَةً تَرْضَاهَا فَوَلِّ وَجْهَكَ شَطْرَ الْمَسْجِدِ الْحَرَامِ وَحَيْثُ مَا كُنْتُمْ فَوَلُّوا وُجُوهَكُمْ شَطْرَهُ وَإِنَّ الَّذِينَ أُوتُوا الْكِتَابَ لَيَعْلَمُونَ أَنَّهُ الْحَقُّ مِنْ رَبِّهِمْ وَمَا اللَّهُ بِغَافِلٍ عَمَّا يَعْمَلُونَ “

كمان المسجد الأقصى كان وجهة النبي محمد في الرحلة المعجزة المعروفة باسم الإسراء والمعراج، ليلة 27 رجب بعد البعثة بعشر سنين (3 قبل هـ).

رحلة ملخصها إن النبيَّ خرج من المسجد الحرام بصحبة المَلَك جبريل راكبًا دابّة البراق، فنزل في المسجد الأقصى وربط البُراق بحلقة باب المسجد عند حائط اتسمي بعد كدة بحائط البراق، والyهود قالك لا ده حائط المبكى المهم أنه صلّى بجميع الأنبياء إمامًا بعدها عُرج به من الصخرة المشرّفة لفوق سبع سماوات مارًا بالأنبياء: آدم ويحيى بن زكريا وعيسى بن مريم ويوسف وإدريس وهارون وموسى وإبراهيم.

نرجع للتاريخ وبعد وفاة النبي وخليفته أبو بكر
تولّى عمر بن الخطاب الخلافة، فكان أوّل حاجة عملها أنه ولّى أبو عبيدة بن الجراح قيادة الجيش الفاتح لبلاد الشام اللي كان أمر بيه الخليفة أبو بكر قبل وفاته بدلاً من خالد بن الوليد.

فوصل أبو عبيدة بن الجراح لمدينة القدس (وكانت اسمها “إيلياء” الوقت ده )، فاستعصت عليهم ومقدروش يفتحوها لمناعة أسوارها، فاعتصم أهلها داخل الأسوار، فحاصرهم لحد ما تعبوا وبعتوا يطلبوا الصلحَ وتسليم المدينة بلا قتال.

لكنهم اشترطوا أن خليفة المسلمين ييجي بنفسه للقدس عشان يتسلّم مفاتيحها منهم.

فخرج عمر بن الخطاب من المدينة المنورة لحد ما وصل القدس، الكلام ده كان سنة 15 هـ الموافق 636م.

أعطى أهلها الأمن وكتب لهم العهدة العمرية.

وصحبه البطريرك “صفرونيوس” فزار كنيسة القيامة،وبعدها وصله لحد المسجد الأقصى.

فلمّا دخله سيدنا عمر قال:

«الله أكبر، هذا المسجد الذي وصفه لنا رسول الله صلى الله عليه وسلم»،

في الفترة دي كان عبارة عن هضبة فاضية في قلبها الصخرة المشرفة، فأمر الخليفة عمر بن الخطاب ببناء المصلّى الرئيسي اللي هيكون مكان الصلاة الرئيسي في المسجد الأقصى، وهو موقع “الجامع القبلي” حاليا واللي الناس بتظن انه وحده المسجد الأقصى.

وده مكانه في الجنوب في جهة القبلة، وكان المسجد في عهده عبارة عن مسجد خشبي يتّسع لحوالي 1000 شخص، وبقي على حاله لحد زمن الخليفة الأموي معاوية بن أبي سفيان.

بعد قيام الدولة الأموية في عام 41 هـ الموافق 661 على ايد معاوية بن أبي سفيان، قام بتجديد بناء المسجد القبلي داخل المسجد الأقصى اللي بناه عمر بن الخطاب.

وخلاه من الحجر بدلاً من الخشب، ووسّعه ليسع 3000 مصلي.

و ذكر بعض المؤرخين المسلمين في مذكراتهم زي مجير الدين والمقدسي والسيوطي أن أوسع حركة تعمير للمسجد تمت في عهد الخليفة عبد الملك بن مروان مت عام 65 هـ الموافق 685 بالإضافة لبناء قبة الصخرة في نفس الفترة.

واستمرت لحد عهد ابنه الوليد بن عبد الملك لحد سنة 96 هـ الموافق 715.

فبدأ البناء الأموي للمسجد الأقصى ببناء قبة الصخرة وهي عبارة عن قبة ذهبية فوق الصخرة المشرفة الواقعة في قلب الأقصى (في منتصف المسجد أقرب إلى الغرب قليلا).

واللي بتمثل أعلى نقطة في جبل البيت المقدس، واللي معراج النبي إلى السماء تم منها.

وأشرف على بنائها المهندسان رجاء بن حيوة الكندي، وهو من التابعين المعروفين، ويزيد بن سلام مولى عبد الملك بن مروان. وقبّة الصخرة عبارة عن بناء مثمن الأضلاع ليه أربعة أبواب الشرح اكتر في الصور.

تمر السنين وتيجي سنة 1033 اللي اتعرض فيها المسجد لأضرار بليغة بسبب وقوع زلزال كبير.

وفي عهد الخليفة الفاطمي الظاهر تم إصلاح الأضرار، وتجديد المسجد بين عامي 1034 و1036.

في عام 1099م، سيطر الصليبيين على القدس، أثناء الحملة الصليبية الأولى.

وبدل ما يدمروا المسجد أطلقوا عليه اسم معبد سليمان، واستخدمه الصليبيين في البداية كقصر ملكي وإسطبل للخيول.

وفي عام 1119م، تم تحويله لمقر لفرسان الهيكل. وخلال الفترة دي خضع المسجد لبعض التغييرات الهيكلية، بما فيها توسيع الشرفة الشمالية، وإضافة حنية (محراب الكنيسة) وجدار فاصل. وتم بناء دير جديد وكنيسة كمان في الموقع، جنبا لجنب مع غيرها من الهياكل المختلفة .

وشيد فرسان المعبد أقباء ( جمع قبو) ومرفقاتها في الجهة الغربية والشرقية للمبنى..ويستعمل القبو الغربي حاليا كمسجد للنساء أما الشرقي فيبستخدم كمتحف إسلامي.

بعد حصار 1187 استطاع صلاح الدين الأيوبي استعادة القدس من ايد الصليبيين، وأجري العديد من الإصلاحات والتجديدات في المسجد الأقصى. من أجل إعداد المسجد لأداء صلاة الجمعة.

ومرت السنين ومفيش حاجة تذكر حصلت هناك لحد ما وصلنا للقرن العشرين اللي حصلت فيه إصلاحات وتجديدات وأحداث كتير لسة بنعيشها لحد انهاردة.

التجديد الأول للمسجد الأقصى في القرن العشرين حصل في سنة 1922، لما كلف المجلس الإسلامي الأعلى تحت أمين الحسيني (مفتي القدس الكبرى) المهندس المعماري التركي أحمد كيماليتين استعادة المسجد الأقصى والمعالم الآثرية في ساحاته.

كمان المجلس قام بتكليف المهندسين المعماريين البريطانيين وخبراء مصريين والمسؤولين المحليين للمساهمة والإشراف على الإصلاحات والإضافات التي نفذها كيماليتين مابين 1924–1925.

واتعرض المسجد الأقصى لأضرار شديدة بسبب وقوع زلازل مابين 1927 و1937، وقد تم إصلاح الأضرار التي لحقت بالمسجد في عام 1938 و1942..بتبرعات من الملك فاروق ملك مصر.

وحصل الاحتلال في 48 وبعدها في 67 ومحاولات اقتحام المسجد الأقصى اتكررت والعقيدة المت@طرفة لهدمه وبناء مكانه هيكل سليمان الثالث المزعوم زي ما وضحنا في المقال استمرت

ففي صبيحة يوم الخميس الموافق 22 أغسطس 1969م اتعرض لحريق على ايد يhودي أسترالي مت@طرف اسمه مايكل دينس روهن.

تم حرق الجامع القبلي اللي سقط سقف قسمه الشرقي بالكامل و احترق منبر صلاح الدين اللي أمر ببنائه نور الدين زنكي قبل تحرير المسجد الأقصى من الصليبيين وقام (صلاح الدين الأيوبي) بوضعه داخل المسجد بعد التحرير.

وقال روهن تعقيبا على الحريق اللي إفتعله أنه كان بيعمل كدة ونفسه كان يتمكن من إحراق المسجد الأقصى بالكامل عشان يعجل المجيء الثاني للمسيح، ويمهد الطريق لاعادة بناء الهيكل اليhودي المزعوم على جبل الهيكل زي ما وضحنا عقيدتهم دي في مقال هيكل سليمان المزعوم.

وفي عام 1972 ، تم ترميم المسجد الأقصى والمنبر معه، وتتولى الأردن ترميم وإصلاح المسجدين على نفقتها الخاصة كلما دعا الأمر .

في يوم 14 أكتوبر 2016، لجنة البرامج والعلاقات الخارجية في المجلس التنفيذي لمنظمة اليونيسكو خدت قرار تاريخي جه فيه أن المنظمة تعتبر المسجد الأقصى أحد المقدسات الإسلامية، بدون ذكر وجود أي علاقة تاريخية بين اليhود والمسجد، ومستنكرة اقتحامه المتكرر من قبل بعض المت@طرفين الإسrائيليين ومن قبل الجيش الإسrائيلي.

القرار ده مجاش من فراغ ده جه استجابةً لمشروع تم تقديمه من مصر والجزائر ولبنان والمغرب وعمان وقطر والسودان.

ورحبت منظمات وهيئات إسلامية بالقرار وفي مقدمتها منظمة التعاون الإسلامي ومرصد الجامع الأزهر، وهيئة علماء المسلمين في العراق، لجانب الحكومة والفصائل الفلسطينية.

تفاصيل المسجد الأقصى زي ما قلت اكتر من 200 معلم جمعتلكم أغلبهم في الصور مع شرح توضيحي لكل معلم تحت كل صورة قدر الإمكان للي حابب يتعرف على مقدسنا الإسلامي المحتل…فيها معلومات قد المقال ده عشرين مرة.

فمثلا بيتكون من أربع مآذن ومن سبع مصليات أو مساجد معمدة مع عدة قاعات صغيرة إضافية من الجهة الغربية والشرقية من الجزء الجنوبي من المسجد.

ده غير أنه كان موجود 121 نافذة من الزجاج الملون في المسجد من عصور الخلافة العباسية والفاطمية. تم استعادة حوالي ربعهم في عام 1924.

ده ملخص بسيط لتاريخ ومكونات واهميته التاريخية والدينية عند المسلمين لو وصلت لحد هنا ساعد في نشر الكلام ده بالشير وارجع اتفرج على الصور والشرح اللي تحتها واستمتع باللي هتشوفه.

وأتمنى أكون نجحت في توصيل المعلومة بشكل واضح ومبسط وبعتذر عن الاطالة.