مبدئيا كده الكلام هيكون علي نوعين من الشركات
النوع الاول هو الشركات المتوسطه والكبيره.
النوع التاني الشركات الصغيره والمكاتب والمقاول.
انا هتكلم عن النوع التاني فقط
والكلام اللي هقوله هينطبق علي النوع الاول لكن باختلاف الارقام اللي هتكون اضعاف مضاعفه طبعا.
اولا يا بشمهندسين انا كمقاول لما بتجيلي مقايسه مشروع او بند… الخ
بعمل حسابي ف التسعير علي كل حاجه واهمها نسبة الاشراف اللي غالبا بتكون 3٪ من قيمة المقايسه
يعني بحسبة بسيطه لو طبقنا الكلام ده علي المشروعات الدارجه ف السوق حاليا
مثلا عمارات الاسكان الاجتماعي او مشروعات حياة كريمه
هنلاقي ان مقايسه العماره الواحده تتخطي ال 8 مليون جنيه وهنفترض ان المقاول او المكتب ده واخد عمارتين علي الاقل.
يعني ب 16 مليون جنيه
هامش ربح كل عماره ف المشروعات دي بعد الضرائب والاستقطاعات بيكون 20٪ وبيزيد علي حسب شطارة كل مقاول يعني مكسبه بيكون حوالي 3 مليون و مائتان الف جنيه
والله الارقام دي عن تجربه شخصيه ممكن تقل حجات بسيطه او بتزيد حجات بسيطه
طيب نسبة الاشراف هتكون 3٪
يعني حوالي 480 الف جنيه
لو قلنا ان مدة المشروع بتكون سنه يعني الشهر الواحد ب 40 الف جنيه رواتب.
تخيل حضرتك المقاول بيجيب كام مهندس يشرف علي العمارتين؟؟ .
اكيد كلنا عارفين الاجابه.
طبعا هو مهندس واحد بيكون مهندس موقع وجوده ومكتب فني ومحاسب وغفير وعامل كمان.. مهندس واحد بيشتغل كل اللي فات ده
وبيديله راتب كام بقا 2500 او 3000 ولو كان مقاول كريم اوي هيبقا 4500
انتم متخيلين التفاوت ف الارقام عامل ازاي
والله مفيش مقاول بيخسر الا لو اتعرض لنصب او الشركة اللي واخد من باطنها الشغل اكلت فلوسه.
دي الحاله الوحيده اللي المقاول بيخسر فيها.
انا كلمتكم علي اقل الجهات اللي بتطلع هامش ربح وهي الهيئه الهندسيه وادارة المهندسين العسكريين.
فيه جهات بقا زي المخابرات والداخليه هامش الربح فيها بتخطي ال 40 وال 50 ف الميه كمان.
اما بالنسبه بقا لشغل حياه كريمه اقل مشروع مثلا زي مركز شباب او وحده صحيه او مكتب بريد هيتم رفع كفاءتهم
اقل مقايسه فيهم بتتخطي المليون جنيه
والمقاول بياخد اقل حاجه 5 او 8 مراكز شباب يعني بالمتوسط بيكون واخد شغل بحوالي 6 مليون جنيه.. مدة المشروع بتكون 3 او 4 شهور بالكتير
يعني لو طبقنا النسب اللي فاتت هنلاقي هامش الربح 30٪ يعني حوالي مليون و 800 الف جنيه مكسب ف 3 شهور
نشوف بقا نسبة الاشراف هتكون حوالي 180 الف جنيه
يعني ف الشهر حوالي 60 الف جنيه
والمقاول هيجيب نفس المهندس وهيديله نفس الرواتب اللي قلنا عليها.
والارقام دي انا كسبتها من شغل وغير كده كمان كنت مدير مشاريع كتير زي كده وعارف ان الارقام دي هي نفسها ف كل الشركات.
.
اما بالنسبة بقا للنوع الاول وهي الشركات الكبيره ودي الشركات اللي الفئه بتاعتها بتتراوح من الفئه (4 و 3 و 2 و 1)
والشركات دي غالبا حجم الاعمال فيها بيكون كبير جدا لدرجه تتخطي المليارات بس نفس الكلام اللي قلته ع النوع الاول هو مع اختلاف الارقام اللي طبعا هتكون اضعاف مضاعفه وعدد (المهندسين) هيزيد مع زيادة بعض المحاسبين علي المشرفين
وبردوا نفس الرواتب
التعليقات مغلقة.