-كنت عاوزة اسألك سؤال
=اتفضلي
-ليه مديتش للجرسون بقشيش ؟
=واديله ليه بقشيش ؟ هما واخدين 12.5% خدمة !
-عادي لازم تدفع بقشيش خصوصا ان الخدمة كويسة جدا
=ما وضع طبيعي ان الخدمة تبقي كويسة جدا ده فندق 5 نجوم يعني أسعاره سياحية لازم الخدمة تبقى كويسة ، لو مش كويسة تبقى مشكلة كبيرة جدا وبعدين فيه حاجة بقى يا سامية الراجل الجرسون اللي بتقولي لازم اديله بقشيش ده اكيد قعد يدور علي واسطة كبيرة جدا علشان يقدر يشتغل في فندق 5 نجوم زي ده صح ؟؟ يبقى هو مهنته في الحياة انه يقدم طلبات وياخد قصادها أجر ده وضع طبيعي اوي زي الدكتور ما بيعالج المرضى ، زي المهندس ما بيبني عمارات ، زي المدرس ما بيعلم التلامذة بعيدا عن الدروس الخصوصية يعني .. غلط اوي ان احنا ندي بقشيش .. اسألك سؤال يا سامية ، انتي في شغلك مش بتاخدي مرتبك ؟
-طبعا امال هشتغل ببلاش ؟!
=حلو اوي ، عمرك بقى خدتي مرتبك وعليه بقشيش ؟
-بقشيش ؟! لأ طبعا
=طيب اشمعنا انتي بقى مطالبة طول ما انتي ماشية تدفعي بقشيش ؟! تركني العربية البواب يبصلك عاوز بقشيش .. المكوجي يجيبلك المكوى عاوز بقشيش .. تروحي تشتري سندوتش الراجل يحطلك طمطماية زيادة علشان عاوز بقشيش .. تروحي تجيبي فستان الست تبصلك تقولك الحلاوة يا ست .. واحد تاني يقولك الشاي يا ست .. كل ده ما دام ملوش لازمة وما دام ملوش معنى يا اما يبقى نصب يا اما يبقى تسول
-ياااااه ، ده انت مكبر الحكاية اوي !!
=انا مبكبرهاش ، الحكاية كبيرة لوحدها .. كبيرة لدرجة انها وصلت لكارثة !
(حكايات زوج معاصر … ٢٠٠٣)
التعليقات مغلقة.