المقال ده فيه شرح وافي لأسباب اندلاع الأحداث في فلسطين المحتلة بالشكل اللي كلنا متابعينه دلوقتي بشكل مفصل.
ناس كتير مش مهتمة ولا متابعة سياسة واتفاجئت في آخر كام يوم رمضان باندلاع الأحداث فجأة في فلسطين وبدأوا يتفاعلوا مع الأحداث بعد كدة من غير ما يركزوا أوي هو إيه اللي حصل أصلا خلي الدنيا تقوم هناك ومتقعدش.
خليني أقولك اني اللي حصل هناك كان معروف ومتوقع إلى حد ما ومعلن كمان قبلها بفترة واللي متابعني هيلاقيني كلمتكم بالتفصيل عن كل حاجة هناك قبل ما الموضوع يتفاقم بالشكل ده.. وهنعيد سرد القصة بشكل مبسط عشان نفهم.
اللي حصل كالآتي :
قضية حي الشيخ جراح
حي في مدينة القدس المحتلة محكمة إسرائيلية حكمت بطرد عائلات فلسطينية منه بحجة ان الأرض مش ملكهم مع أنهم أصلاً أخدوا الأرض دي وبنوا عليها بيوت بعد سنة 48 في مقابل أنهم يتنازلوا عن أرضهم اللي اخدتها منها العصابات الصhيونية وفي مقابل كمان أنهم يتنازلوا عن أي حقوق ليهم كلاجئين بالاتفاق مع الأردن والأمم المتحدة.
المهم إسرائيل ضربت بكل ده عرض الحائط بهدف تهجيرهم من الحي في خطة أوسع واشمل لتهويد القدس كلها وهنفهم كمان شوية يعني إيه تهويد القدس وليه.
الناس رفضت وحصل تضامن شعبي فلسطيني مع أصحاب البيوت خاصة ان المستوطنين بدأوا في حملات استفزازية لسكان البيوت ودخلوا في صراع مباشر معاهم تحت حماية شرطة الاحتلال وبدأ صوت الناس هناك يتسمع ويتعرف بس برضو مكانش بنفس القوة ولا التسليط الإعلامي اللي حاصل حالياً كل الفكرة ان المحكمة كانت مدياهم لحد يوم 10 مايو اللي فات كميعاد نهائي للوصول لحل سلمى او التهجير.. لكن قضية الحي مش هي السبب في اشتعال الأحداث كانت مجرد بداية لإعادة التفات الناس من جديد للقضية الفلسطينية.
صحيح حصلت مناوشات بين المصلين في المسجد الأقصى وقوات الاحتلال بسبب القضية دي بس كانت محدودة ومعقولة وقتها.
اللي فات فيما يخص قضية حي الشيخ جراح مختصر جدا لو حابب تعرف القضية كلها بالتفصيل فلازم تقرا المقال اللي كتبته ده كله
انتهاكات الاحتلال ضد أصحاب البيوت في حي الشيخ جراح
يوم 25 رمضان الموافق 7 مايو
قوات الاحتلال تقتحم المسجد الأقصى على المصلين بقنابل الغاز المسيل للدموع والرصاص المطاطي وحاصروا المصلين والمصابين وصلوا لاكتر من 500 مصاب
مصليات فلسطينيات ثابتات محاصرات من داخل المسجد الأقصى
لكن حصل تضامن من أهالي فلسطين كلهم ونزحوا للمسجد الأقصى لدرجة إنه في ليلة القدر تاني يوم 90 ألف مصلي كانوا في باحة المسجد الأقصى بيصلوا التروايح والتهجد
واستمرت الهدوء يوم 27 رمضان لحد ما اندلعت الأحداث الحقيقية يوم 28 رمضان زي ما كان متخططله قبلها بشهر ونص وده شرحته بالتفصيل قبلها وهشرحلكم أزاي.
في البداية لازم يكون عندك خلفية بسيطة عن عقيدة الصهيونية في حاجتين مهمين.. المسيح المخلص ، وهيكل سليمان الثالث المزعوم.
يوم 27 مارس الي فات ظهر حاخام أسباني في القدس وخطب هناك وعرف نفسه على أنه الشخص اللي هيمهد لظهور المسيح المخلص لليهود واتقابل هناك بحفاوة شديدة
المهم ظهوره ممكن يعتبر إشارة او حافز للجماعات المتطرفة أنهم يسرعوا في تجهيز القدس لاستقبال مسيحهم المزعوم وده عن طريق هدم المسجد الأقصى وبناء مكانه هيكل سليمان الثالث المزعوم.
ولو مش فاهم إيه قصة هيكل سليمان الثالث المزعوم ده وليه عايزين يهدوا المسجد الأقصى وليه عايزين يبنوا مكانه هيكلهم يبقى لازم برضو تقرأ المقال ده اللي شرحت فيه الموضوع بالتفصيل
المهم إيه علاقة اللي فات ده كله بيوم 28 رمضان بالأحداث اللي حصلت هناك ؟
اللي حصل انه يوم 3 أبريل اللي فات جماعات متطرفة متعصبة صراحة للفكرة السابقة الخاصة بهدم المسجد الأقصى وبناء مكانه هيكل سليمان الثالث المزعوم واتسمت اجمالا بجماعات الهيكل نسبة لفكرة هيكلهم عملوا مؤتمر وقالوا والله يا جماعة إحنا عايزين نقتحم المسجد الأقصى يوم 28 رمضان اللي جاي ب2000 متطرف ونصلي هناك.
ليه كدة ؟
قالك عشان عايزين نهود القدس وناخد خطوة أكبر في تحقيق حلمنا الأكبر بهدم المسجد الأقصى وإقامة الهيكل الثالث بتاعنا مكانه.
يعني إيه تهويد القدس ؟
القدس حتى هذه اللحظة ورغم الاحتلال اللي تجاوز ال 73 سنة ما زالت محتفظة بطابعها وهويتها العربية الإسلامية فهما مقهورين من ده وعايزين يهودوها بأي شكل يعني تغير هويتها للهوية اليهودية.
طب اشمعنا يوم 28 رمضان بالذات ؟
لسببين السبب الأهم أنه حسب تقويمهم العبري اليوم ده موافق لعيد عندهم اسمه عيد توحيد القدس.
معلش إيه عيد توحيد القدس ده كمان ؟
بص يا سيدي في 14 مايو 48 يوم النكبة لما أعلنت اسرايييل عن قيام دولتها أعلنت ان عاصمتها هي القدس الغربية والشرقية دي بتاعة فلسطين.
في يوم 5 يونيو 67 النكسة يعني.. الكيان ضم القدس الشرقية اللي فيها المسجد الأقصى ليه وقالك القدس كلها بتاعتنا فاليhود بيزيطوا باليوم ده وبيحتفلوا بيه كل سنة على انه العيد لتوحيد القدس وعايزين كانوا يحتفلوا بيه السنة دي بالطريقة اللي قلتلكم عليها.
إيه طيب السبب التاني لاختيارهم يوم 28 بالذات.
قالك وكمان فرصة المسلمين هيكونوا خفوا جدا من المسجد بعد ليلة القدر ومش هنلاقي مقاومة تذكر.
طبعاً الكلام ده شرحته كله بالتفصيل لو حابين تعرفوا اكتر عن خططهم وأهدافهم لليوم ده.
لكن كل خططهم دي كانت معلنة ومعروفة والفلسطينيين كانوا منتبهين ليها بشدة عشان كدة رابطوا في المسجد واستعدوا لليوم ده بعزيمة شديدة.
يوم 28 رمضان حصل اللي كان متوقع من محاولات الجماعات المتطرفة لاقتحام المسجد بل والدخول في مناوشات مع سكان حي الشيخ جراح وكانوا عايزين يقلبوها فوضى كل ده بمساعدة شرطة وقوات الاحتلال.
اللي عايزة تساعدهم لأهداف منها عقائدية ومنها سياسية لإشغال من حكومتهم لناسهم عن قضايا فساد كبيرة متورط فيها رئيس وزرائهم النتن يا هو.
هجوم قوات الاحتلال فجر يوم 28 رمضان على المصلين داخل المسجد الأقصى
لكن حصل ردين فعل كانوا غير متوقعين ليهم بالمرة واللي كانوا أسباب اندلاع الأحداث بالشكل اللي إحنا شايفينه ده.
أولا فشل ذريع لقوات الاحتلال في اقتحام المسجد الأقصى بسبب شجاعة ورباط المصلين بداخله ودفاعم عنه بأرواحهم واجسادهم.
يكفي تشوف البوست ده كدة
على نفس السياق جاء الرد والدفاع من قطاع غزة المحاصر.
قطاع محاصر على الحدود المصرية فيه ملايين الفلسطينيين بيعانوا الحصار من سنوات وبعيد عن منطقة اندلاع الأحداث وده كان مطمن العدو أنهم عزلوا غزة عن القدس وكل واحد هيقول نفسي نفسي لكن اول ما عرفوا باللي عملتوا قوات الاحتلال.. فصائل المقاومة الفلسطينية هناك وعلى راسهم حماس والجهاد وعشرات الفصائل الأخرى عملوا غرفة عمليات مشتركة وطلعوا بيان مشترك واضح وصريح موجه للعدو
والله لو ما انسحبتوا من الأقصى وبطلتوا عمايلهم فيه لنقصف تل أبيب الساعة 6 بصواريخ من غزة!
بيان شديد اللهجة ومحدد لكن اسرايييل قالت لا ياعم ده اي كلام أكيد بيهوشوا عشان الساعة 6 تيجي وفعلاً المقاومة تقصف تل أبيب وضواحيها بالصواريخ من غزة.
وتستمر القصف وقوات الاحتلال تسيبها من الأقصى وحي الشيخ جراح وتحول صراعها وقصفها وفوهات مدافعهها وطيراتها كلها تجاه غزة!
ويستمر الصراع لحد دلوقتي اللي امتد لصراع جديد من نوعه كمان بين الفلسطينيين والعرب اللي عايشين في المستوطنات في الضفة الغربية وغيرها من ناحية وبين شرطة الاحتلال والمستوطنين نفسهم من ناحية تانية.
وده في تضامن محصلش من زمان بين أهل الضفة الغربية وغزة والقدس وفلسطين كلها ومازالت الأمور في اشتعال والكيان مش قادر يسيطر على الأوضاع هناك.
عشان العالم كله يوجه اهتمامه كله من جديد للقضية الفلسطينية ومأساتهم المستمرة مش من 48 بس ده قبلها بسنين كمان ولحد يومنا ده.
لكن ناس كتير لقيت نفسها فجأة وسط قصف من المقاومة والكيان بيرد بقتل وهدم وقصف للمدنيين ومحدش كان فاهم هو إيه اللي وصل الأحداث للمرحلة دي.
عشان كدة حاولت الخصلكم الأحداث كلها من البداية لحد دلوقتي على حد علمي.
التعليقات مغلقة.