دعموا شبابنا

مصطفى السويفي شاب مصري عنده 24 سنة من قرية كفر الخضرة مركز الباجور محافظة المنوفية “مصطفى” من فترة في باله فكرة عايز ينفذها بإيده إنه يعمل عربية تكون صديقة للبيئة!..

فضل يجرب شهر ورا التاني لحد ما قدر ينفذ عربية بإمكانيات محدودة وبتمشي بقوة الهواء بدل الوقود أو أى مواد قابلة للاحتراق!..

فكرة عربية “مصطفى” بتعتمد على موتور بيشتغل بضغط الهواء، ومكونة من هيكل معدني وكمبروسر وإطارات..

وعشان يبقى ماشي الطريق بخطوات صحيحة راح مكتب براءات الاختراع المصري، وسجل براءة اختراع لفكرته واتوافق عليها وتم قبولها..

والد “مصطفى” كان أهم داعم ليه في فكرته وساعده كتير سواء بشكل مادي أو معنوي عشان يوصل لهدفه رغم التريقة وكلام الإحباط اللي كان بيسمعه من باقي الناس..

“مصطفى” ناوي يكمل في تطوير فكرته أكتر وأكتر وبيحلم إن فكرته تخرج للنور بشكل أوسع وتتبناها وزارة الإنتاج الحربي وتبقى أول سيارة مصرية تتصدر للخارج..

شاب مصري حلم بفكرة جايز أى حد كان سمعها منه كـ كلام زمان كان قال إيه اللي بتقوله ده!..

بس هو ميأسش ولا شافها حاجة مستحيلة.. عمل اللي بيعمله أى حد مؤمن بنفسه وقدراته..

قفل على نفسه واشتغل على الفكرة لحد ما نفذ جزء كبير منها وحط رجله على أول الطريق..

نتمنى قريب نشوف عربية “مصطفى” بتتحول لشيء مُلفت ومبهر متطور أكتر كمان ويشد انتباه العالم إن مصر فيها شباب دماغهم عظيمة.