في دكاتره كبار ظهرت الأيام دي بتهاجم نظام الكيتوا دايت بصوره مبالغ فيها.
المفروض حتي لو هتهاجم شئ نتيجته هايلة المفروض من باب الأمانه تنصح بإنه مثله مثل العلاج مضر لكن لازم تاخده علشان تخف وتتشافا من المرض.
هل براشيم وأدوية ولخابيط والمرار الطافح بتاع سد الشهية وعمليات التكميم وتحويل المسار إللي بردوا دكاتره كبيره بتنادي بيه احسن ولا إني أتبع نظام غذائي أزود فيه البروتين والدهون الصحيه مدعوم بخضار قليل الكربوهيدرات ودي حجات طبيعيه خلقها ربنا.
نحكم عقلنا شويه.
للأسف عدم الضمير بيخلي شخص عنده علم يهاجم شئ ناجح ومشهور ومجرب ويستغل علمه ومكانته لتضليل الناس علشان يتشهر اكتر أو ممكن يكون قابض من مافيا شركات الادويه.
وللعلم الكيتوا نظام قاسي جدا وتطبيقه يكاد يكون مستحيل في المجتمع إللي إحنا عايشين فيه فنطمن إننا مش هنقدر نستمر علي الكيتوا ويبقي اسلوب حياة لكن انك تمنع النشويات الصريحة والسكر والدهون المهدرجه والمكرره وتهتم بالبروتين والدهون الصحية والكربوهيدرات المعقده ده لازم تعمله.
من الآخر
إحنا مش قادرين نستغني عن الخبز والرز ومشتقات الدقيق لدرجة إننا مش عارفين نقلل كمياتهم.
بالذمه ينفع نتكلم عن أضرار الكيتوا ده حتي يبقي ظلم وافترا علي حاجه مجربنهاش.
لو مش عاجبك الكلام روح اعمل عملية تكميم أو خد أدويه ساده للشهية
ولو بتحب المعجنات والحلويات ومش هتقدر تستغني عن أغلب الفاكهه خليك في اللي انت فيه وملكش دعوه بالكيتوا ولا الدايت من أساسه وخبط علي كرشك وقول ده عز
التعليقات مغلقة.