حط نفسك في المكان اللي جهدك فيه تلاقي له مقابل
وإلا ماتزعلش لما تلاقي نفسك مرسيدس وكلب اجرب قاعد عليك

انت ممكن تشوف الصورة دي وتزعل علي كبوت العربية، أو تتريق علي الكلب وتقول له لما تتعمل حواوشي ماتزعلش هههههههه

أنا بقي شايف الصورة دي بمعناها الحقيقي
انك تحط حاجة حلوة في وَسَط مش مناسب
يعني لما تبقي ساكن في عزبة أو منطقة عشوائية وتشتري عربية بمليون جنيه وبعدين عيل بمفتاح يخربشهالك ، تاكد ساعتها أنها غلطتك
غلطتك انك حطيت نفسك وسط عالم مابتفهمش، هتدوس عليك ومش هتقدرك

لما تروح تتقدم لشغل ووظيفة وانت عندك من الخبرات والمهارات اللي تشغلك في أماكن افضل وترضي تشتغل شغل معفن مع مدير محدود الفكر ، ماتزعلش لما تلاقي عدم تقدير وتحس بالدونية

انك تخش بيت تتقدم لبنتهم وتتكلم عن خطتك وطموحك واهدافك، وتلاقي واحد بيقول لك أنا أهم شئ عندي المظاهر والشكليات وال١٠٠ جرام دهب، وتوافق وبعدها تحس انك جيت علي نفسك واتداينت ومش عارف تحقق نفسك ولا مشروعك
ماترجعش تزعل ، لان انت اللي قبلت تدفن نفسك مع ناس مش شبهك ولا انت فارق معاهم بنكلة

الكلب اللي في الصورة دا طلع يمدد شوية علي المرسيدس وهو شايفها عربية زي اي عربية
ماتخليش انت بقي حد يشوفك عربية زي اي عربية
يشوفك حد زي اي حد

ماتتهاونش مع نفسك ، وحط نفسك في المكان المناسب مع الناس المناسبة اللي تقدرك وتفهم قدرك ، اللي تشوفك جوهرة وشئ ثمين
حط نفسك في المكان اللي تنجح فيه ، اللي جهدك فيه تلاقي له مقابل
وإلا ماتزعلش لما تلاقي نفسك مرسيدس وكلب اجرب قاعد عليك