وردني سؤال يقول:
كنت اتمنى لو حضرتك ممكن تفيدني في حسم تحريم تربية الكلاب في المنزل. هناك خلافات كثيرة حول الموضوع و أنا شخصياً أرى أن هناك شئ غير واضح وغير منطقي من الناحية الإنسانية والعلمية والدينية في تحريم هذا الأمر.
الحيوانات الأليفة ومن ضمنها الكلاب لها دور مهم وفعال جدا في علاج الكثير من الأمراض النفسية والسلوكية و الجسديه وبالأخص الكلاب.
فكيف تكون للكلاب مثل هذه الأهمية والخدمة لحياة الإنسان ويكون محرم وغير مسموح بتواجده في المنزل. شكرا جزيلا لك وجزاك الله خيرا.
فكان الجوابُ:
فيه مبدأ عايز ألفت نظرك له ولو استوعبناه جيداً هتتحل كتير من القضايا لنا.
المبدأ دا هو أن الإنسان يستحيل أن يُحيطَ بحكمة الله وأسباب تشريع الأحكام
نحن مخلوقون للعبادة، والعبادة معناها التسليم للمعبود.
فالله نهانا عن اقتناء الكلاب دون سبب من الأسباب المعلومةِ شرعاً لنا وهي الحراسة والزراعة والصيد وما يُقاسُ عليها.
طيب
دورنا إيه؟
دورنا هو: “سمعنا وأطعنا”
وهكذا يكون ديدَنُ الإنسانِ فينا إذا بلغه حكمُ الله..يقول فوراً: سمعتُ وأطعتُ.
لماذا؟
لأن عقلي يقول لي: لستَ أعلمَ بالأمور من صانعِك؛ صانِعُكَ يرى ما لا ترى: صانعُكَ يعلمُ ما لا تعلم..ليس من المنطقيِّ أن تقيسَ أوامرَه التي هي أكبرُ من معرفتِك برؤيتِك وخِبرتِكَ التي لا تساوي شيئاً أمام الصانعِ الذي منحكَ هذه الخبرة وهذه الرؤية وهذا العقل.
النتيجة هي: آمنتُ بالله، وسَلَّمْتُ له، وسألتزمُ أوامرَه، وسأجعلُ مُرادَه هو وِجهتي.
س : يعني دلوقتي تربيه الكلاب ف البيت بغرض ادخال الطاقه الايجابيه و الهزار معاه و تربيه كويسه ليه دا حرام و لا حلال
ج : معصيةُ الله لا تُورِثُ طاقةً إيجابيةً
- الناس بياخدوا معلوماتهم من أي مصدر من غير ما يسألوا عن أصلها أو صحتها، ولما ييجوا على الشرع لازم يتفلسفوا ويقولوا لأ مش هنعمل حاجه من غير ما نفهم الفايدة منها!
- أفتكر إننا في أول بروتوكول لكوفيد كان الاطباء يكتبون دواء كلوروكين من ضمن العلاج، ودا أصلاً دوا ملاريا..
- ومع ذلك أي واحد كان بيتكتب له كان بياخده، والموضوع وصل إن الناس كانوا بيروحوا يجيبوه من نفسهم لما تظهر عليهم أعراض، لحد ما جت فترة وخلص من الصيدليات.. وطول الفترة دي محدش سأل خالص ايه علاقة الملاريا بالكوفيد!
- وبعدين البروتوكول اتعدل وقالوا إن الكلوروكين مالوش لازمة، فالناس بطلت تاخده.. وبعدين الأيفرميكتن اتحط في البروتوكول، ودا أصلاً دوا جَرَب.. برضو الناس راحت تاخده سواء بروشتة أو من غير روشتة من غير ما يسألوا ايه علاقة الجَرَب بالكوفيد..!
- لكن تيجي انت تنقل كلام ربنا وتقول مثلاً إن العسل فيه شفاء للناس! لأ معلش بقى اقنعني.. حطهولي كدا تحت الميكروسكوب وحللهولي كيميائياً وفيزيائياً وطلعلي خواصه الفارماكولوجية، وهاتلي المصدر العلمي للكلام دا..
- فـ نفسي أعرف ليه لما نقولك دا بروتوكول منظمة الصحة، ولا أي منظمة أجنبية مابتعترضش، ولما نقولك ربنا والرسول قالوا تبدأ تطلع العالِم اللي جواك وتسأل ميلون “ليه”!
- هو عموماً ماينفعش تدور على تفسير لكل حاجه في الشرع.. عشان صدقني لو دخلت في دوامة الـ “ليه؟” مش هتخلص.. فـ انت من الأول تبقى عارف إن الإجابة لكل سؤال في الشرع هي :”عشان ربنا أمرنا بكدا”..
- لو واحد سألك ليه بنصوم وقعدت تقوله عشان نحس بالفقرا والغلابة والمساكين، هيقولك ببساطة : طاب ليه الفقرا بيصوموا؟.. لو قولتله أصل الصيام مفيد للجسم ودلوقتي غير المسلمين بيطبقوا نظام الصيام المتقطع وبلا بلا بلا.. هيقولك طاب ليه من الفجر للمغرب؟ ليه مش من المغرب للفجر؟ ليه مش بنشرب ماية؟ ليه كفارة الإفطار في رمضان إطعام 60 مسكين؟ ليه مش 59؟ ليه مش 61؟ ليه نصاب الزكاة 85 جرام دهب؟ ليه مش 84 ولا 86؟
- حرفياً هتتسأل مليون ليه ومش هتلاقي ولا إجابة.. ولو لقيت إجابة لسؤال مش هتلاقي إجابة للي بعده.. فـ من الأول تبقى إجابتك “عشان ربنا قال كدا”.. بنصلي الفجر ركعتين قبل طلوع الشمس عشان ربنا قال كدا..
- الصلاة فيها ركوع واحد وسجدتين عشان ربنا قال كدا.. بنطلع في الزكاة ربع العشر مش نُص العشر ولا خُمس العشر عشان ربنا قال كدا.. العسل فيه شفاء للناس عشان ربنا قال كدا.. بناكل عدد وتر من التمر عشان الرسول قال كدا..
- والله لو العلم وافق معلومة في الشرع قشطه يعني.. مفيش مشكلة.. مش هيزود الشرع حاجه.. الشرع مش مُعتمد على العلم.. عملوا بقى دراسات على الحجامة ولقوا إنها بتنقي الدم وبتحمي من الأمراض، حطوا العسل تحت الميكروسكوب وحللوه ولقوا إنه بيشفي.. جربوا الصيام المتقطع ولقوا إنه مفيد.. مفيش مشكلة.. بس برضو احنا بنعملهم اتباع لأوامر ربنا وأوامر الرسول..
- كل دا بعيداً عن الناس اللي بيخترعوا حقايق عملية من خيالهم عشان يثبتوا صحة حديث للنبي – مع إن كلام النبي غني عنهم وعن كذبهم -.. زي اللي يقولك أثبتت دراسات مش عارف ايه إن أكل عدد وتر من التمر بيعمل هالة حوالين البني أدم تحميه من الطاقة السلبية.. وإن في أبحاث أوروبية أثبتت إن رفع الصباع في التشهد بيحسن الدورة الدموية.. وإن بتوع ناسا طلعوا القمر لقوا إنه مشقوق من النص فـ كدا يبقى “اقتربت الساعة وانشق القمر” آية صحيحة فعلاً وحديث إنشقاق القمر صحيح.. على اعتبار إن القرآن مستني ناسا تثبت صحته! وعلى اعتبار إن ربنا اللي شق القمر نصين مش قادر إنه يرجعه زي الأول من غير شقوق!
- تخيل إنك راجل مؤمن اهو وشايف الكلام دا عبيط! ما بالك بقى لو واحد مش مسلم أو واحد شاكك في دينه أو واحد علماني شاف الكلام دا! طبعاً هيشك في الدين أكتر.. فـ الجماعة دول حرفياً بيضلوا الناس وهم يحسبون أنهم يحسنون صنعا..
- وفي جماعة تانيين اللي بيقعدوا يستميتوا عشان يطلعوا إعجاز عددي في القرآن وسايبين محتوى القرآن المُعجر نفسه.. تلاقيه بيقولك مش عارف لو جمعت حروف سورة ايه وسورة ايه وقسمتهم على 1.3 وجمعت عليهم 86 هيطلعلك 365 اللي هو عدد أيام السنة.. هل دي صدفة؟ لأ طبعاً.. دي رسالة ربنا باعتهالنا إننا نقرأ القرآن كل يوم من أيام السنة.. سبحان الله!
- في ناس سابوا الغاية من العبادات وراحوا يتلحسوا في العلم.. سابوا عظمة السجود وكونه الصلة بين العبد وربه زي ما الرسول صلى الله عليه وسلم قال، وانبهروا بالدكتور الأمريكي اللي قال إن دي أفضل وضعية توصل الأكسجين للقلب والرئة.. مع إن دا عبط برضو ومش دي أفضل وضعية ولا حاجه ومعرفش دكتور مين دا اللي بيشيروا كلامه.. بس اهو أي حاجه جمبها أمريكي بنروح نتمحلس فيها وخلاص..
- هتقعد تحزق وتتشال وتتهبد وتدلس حقايق علمية وتتلحس في الغرب عشان تثبت صحة كلام الرسول وكلام ربنا علمياً وفي الآخر هيطلع شكلك عبيط.. والحقيقة إن الإسلام غني عن كدبك وتدليسك.. المؤمن هيؤمن بكلام ربنا عشان دا كلام ربنا مش عشان موافق للعلم.. وعموماً اللي بيدور على تفسير علمي لكل حاجه في الشرع يبقى محتاج يعيد نظر في إيمانه..
سؤال ورد علي الإجابه :
جوابك فيه مغالطة وتقوّل على الله ، فالله لم ينهى في أي أية عن تربية الكلاب ولا غير الكلاب لا بسبب ولا دون سبب . وَلَا تَقُولُوا لِمَا تَصِفُ أَلْسِنَتُكُمُ الْكَذِبَ هَذَا حَلَالٌ وَهَذَا حَرَامٌ لِتَفْتَرُوا عَلَى اللَّهِ الْكَذِبَ إِنَّ الَّذِينَ يَفْتَرُونَ عَلَى اللَّهِ الْكَذِبَ لَا يُفْلِحُونَ {النحل:116}
قال تعالى: ﴿ يَا أَيُّهَا الَّذِينَ آمَنُوا أَطِيعُوا اللَّهَ وَأَطِيعُوا الرَّسُولَ وَأُولِي الْأَمْرِ مِنْكُمْ فَإِنْ تَنَازَعْتُمْ فِي شَيْءٍ فَرُدُّوهُ إِلَى اللَّهِ وَالرَّسُولِ إِنْ كُنْتُمْ تُؤْمِنُونَ بِاللَّهِ وَالْيَوْمِ الْآخِرِ ذَلِكَ خَيْرٌ وَأَحْسَنُ تَأْوِيلًا ﴾ [النساء: 59].
الأحاديث التي نهى فيها الرسول عن تربية الكلاب في المنزل بدون سبب عديدة …. ابحث عنها كثيره ومنها :
النبي صلى الله عليه وسلم قال: (من اتخذ كلباً إلا كلب ماشية أو صيد أو زرع انتقص من أجره كل يوم قيراط).
النبي صلى الله عليه وسلم هو رسول الله، ولا يشرع من عنده، بل بوحي من الله.
وهذا واضح يعلمه كل مسلم
اللهم علمنا ما ينفعنا وانفعنا بما علمتنا
التعليقات مغلقة.