السلام عليكم و رحمة الله و بركاته و تحية لكل المهندسين
بما ان الموضوع اصبح هزلي تماما ف موضوع التقليل من المهندسين الي من كليات خاصة و استحقار و ترهيب و نبذ حابب احكي قصة بسيطة انا ف بداية سفري في دبي اشتغلت بشركة الحمد لله كبيرة و في اول مشروع ليا مدير مشروعي نبذني بمجرد معرفته اني من كلية خاصة فقط و بدون معرفة او حتي زيارة للموقع و طبعا مع تمييز لمهندسين الجامعات الحكومية و الناس الي بتعرف تاكل بالكلام بقا يديني اقل تقييم ف المهندسين و مع الازمة ف الخليج عموما الشركة اضطرت تمشي ٣٠٪ كنت انا اول واحد فيهم بسبب تقييمي و لكن كان معايا project engineer اتمسك بيا و نقل الصورة الصح لمدير المشروع و دعاه ينزل و الحمد لله نزل و شاف مين بيتقي ربنا ف شغله و بيدي تقارير سليمة واقعية و كفاءة الشغل ف الموقع و الحمد لله رجعوني للشغل و يمكن الاتنين موجودين دلوقت ف الجروب و يشوفوا البوست دا.
-متفق تماما ان الموض ع بقا اوفر في المعاهد الي ب ٦٠ و ٧٠٪ و مستوي دراسي اقل من قليل بس في مهندسين كليات خاصة كتير فلتت منهم هندسة علي ١ او ٢ ٪ و تخيل مثلا بتكون درجة او اتنين فقدهم في الاعراب ف العربي او التعبير انا كنت واحد جايب للاسف ١٨ من ٣٠ في العربي و دا الي خلي والدي يصر ان يدخلني خاص رغم اني كنت رايح اقدم ف تجارة.
-التعليم قبل الكلية او ف الكلية لا يؤهلك انك تكون مهندس بالفخامة الي انتو بتتكلموا عنها ف الكليات الحكومية و اشتغلت مع كتير مأثبتوش نفسهم من الجانبين و ف النهاية الي بيطور نفسه من بعد المعمعة الحقيقية الي هو بيكمل.
-الكليات الخاصة مش هي الي قللت فرص شباب كتير و لكن الواسطة هي السبب بعد ما رجعت مصر حاولت اقدم ف اماكن كتير من الشركات المحترمة اصلا الCV مش بيتشاف و ف المقابل ف ناس تانية بتحدد مرتبها و هي ف البيت و مش فارق خاص او حكومة المهم الواسطة.
-الوحيد الي صادفته حديث تخرج و متأسس صح كان واحد خريج الجامعة الامريكية كلنا كنا كبار و رايحين بنتعلم لسا Coordination او اي حاجة عن الMEP و صعب علينا بينما هو كان دارس و بيشرحلنا الي هي بردو تعتبر حاجة خاصة بفلوسك.
الخلاصة المنظومة التعليمية فاشلة و الجي افشل.
و انا كمهندس درجة تانية من كلية خاصة هسيبلكوا الجروب تتهنوا بيه و النقابة و يا ريت كل واحد يركز ف شغله بنفس القدر الي مركزين بيه ف الحوار دا و ساعتها هتكون سمعة الشغل ف مصر كويسة بدل ما بنتعامل برا علي اننا خريجين دبلومات و بردو بدون تفرقة بين حكومي او خاص.
و اسف علي الاطالة
التعليقات مغلقة.